اسلام آباد (نیوزڈیسک) وزیر اعظم نواز شریف نے پیغمبر اسلام حضرت محمد صلی اللہ علیہ وسلم کے یوم ولادت پر قوم کو مبارکباد دی ہے ۔ ان کا کہنا ہے کہ اللہ اور اس کے رسول کی محبت ہمارا سب سے بڑا سرمایہ ہے ۔ حضور اکرمؐ کی محبت کا تقاضا ہے کہ باہمی اختلافات بھول کر مسائل کا حل افہام و تفہیم اور مشاورت سے نکالا جائے ۔ وزیر اعظم نواز شریف نے سرور دو جہاں حضرت محمد ؐ کے یوم ولادت پر اپنے خصوصی پیغام میں کہا کہ اللہ تعالیٰ کا شکر ہے کہ اس نے ہمیں نبی صلی اللہ علیہ وسلم کا امتی ہونے کا شرف بخشا اور اپنے پیارے نبیؐ کے ذریعے اپنا پسندیدہ دین عطا فرمایا ۔ ان کا کہنا ہے کہ حضوراکرم صلی اللہ علیہ وسلم نے انسانیت کی تکمیل کیلئے اعلیٰ و ارفع تعلیمات ہم تک پہنچائیں ۔ سیرت پاکؐ میں امت کیلئے مکمل ہدایت اور رہنمائی ہے ۔ حضور اکرمؐ کا کردار ، عمل اور تعلیمات پوری زندگی کا احاطہ کرتی ہیں ۔ سرور کونین حضرت محمدؐ کی ولادت سسکتی مخلوق اور مرجھائے ہوئے باغ انسانیت کیلئے ابر بہار کی حیثیت رکھتی ہے ، وزیر اعظم کا کہنا ہے کہ اللہ اور اس کے رسول حضرت محمدؐ کی محبت ہمارا سب سے بڑا سرمایہ ہے ۔ حضور اکرمؐ کی محبت کا تقاضا ہے کہ علاقائی ، مسلکی اور سیاسی اختلافات ختم کرنے اور مسائل کا حل افہام و تفہیم سے نکالا جائے ۔ باہمی اتفاق ، اتحاد اور مشاورت میں ہی ہم سب کی بقاء ہے ۔ دعا ہے کہ اللہ تعالیٰ پاکستان کو امن کا گہوارہ بنائے اور ہمیں محسن انسانیت حضرت محمدؐ کی شفاعت نصیب فرمائے ۔