اسلام آباد(نیوز ڈیسک)سندھ ہائیکورٹ نے ڈاکٹر عاصم حسین کیس سے متعلق فیصلہ سناتے ہوئے تفتیشی افسر کی رپورٹ مسترد کرتے ہوئے انہیں انسداد دہشتگردی کی عدالت میں پیش کرنے کا حکم دیدیاہے۔تفصیلات کے مطابق ڈاکٹر عاصم حسین کو دہشتگردوں کا علاج کرنے کے معاملے میں عدالت میں پیش کیا گیا جہاں رینجرز، نیب اور ڈاکٹر عاصم کے وکلا نے اپنے دلائل دیے جبکہ تفتیشی افسر نے 300 صفحات پر مشتمل رپورٹ عدالت کے روبرو پیش کی جس میں عدالت سے درخواست کی گئی تھی کہ ڈاکٹر عاصم بے گناہ ہیں لہٰذاانہیں رہا کیا جائے۔ انسداد دہشتگردی کی عدالت کے منتظم جج جسٹس نعمت اللہ پھلپھوٹو نے تفتیشی افسر کی رپورٹ مسترد کرتے ہوئے ڈاکٹر عاصم حسین پر دہشتگردی کی دفعات برقرار رکھی ہیں اور پولیس کو انہیں دوبارہ گرفتار کرنے کا حکم دیے ہوئے انہیں منگل کے روز انسداد دہشتگردی کی عدالت میں دوبارہ پیش کرنے کا حکم دیدیا۔