اسلام آباد(نیوز ڈیسک)بلوچستان کے نامزد وزیر اعلیٰ نواب ثناءاللہ زہری نے جمعہ کو قومی نمائندے سے سیاسی صورتحال پر بات چیت کی۔ اپنی نامزدگی کے بعد یہ انکا کسی اخبار کا پہلا دورہ تھا ، انکے ہمراہ صوبائی وزیر داخلہ میر سرفراز بگٹی، ڈپٹی سپیکر بلوچستان اسمبلی میر قدوس بزنجو ، سینیٹر آغا شہباز درانی ،ضلع ناظم خضدار آغا شکیل درانی بھی تھے۔جنگ رپورٹر بلال ڈار کے مطابق اس موقع پر گفتگو کرتے ہوئے انہوں نے کہا کہ میں کسی علاقے یا خاص قبلے کا نہیں بلکہ پورے بلوچستان کے وزیر اعلی کے طور پر خدمات سرانجام دوں گا اور صوبے کے تمام طبقات کی بلا امتیاز خدمت کروں گا، موجودہ صوبائی کابینہ میں اتحادیوں کی وزارتوں میں ہماری طرف سے کسی قسم کا ردوبدل نہیں ہو گا البتہ مسلم لیگ (ن )کے وزراءکے محکوں میں انکی کارکردگی کو مد نظر رکھتے ہوئے ردو بدل کیا جائے گااور منظم انداز میں وزراءکی کارکردگی کا جائزہ لیا جائے گا ، صوبے میں کسی قسم کی کرپشن برداشت نہیں کی جائیگی۔ انہوں نے کہا کہ اللہ تعالی نے بلوچستان کو معدنی وقدرتی وسائل سے مالا مال کیا ہے ، ہم ان وسائل کو اپنے عوام کی غربت دور کرنے اور تعمیر و ترقی کیلئے استعمال کرینگے۔