اسلام آباد(نیوز ڈیسک) وزیرِ اعظم کے مشیر برائے امور خارجہ سرتاج عزیز نے کہا ہے کہ پاکستان افغانستان میں استحکام اور پائیدار امن کا خواہاں ہے کیونکہ افغانستان میں عدم استحکام پاکستان کے مفاد میں بھی نہیں ہے۔پاکستان کے دفترخارجہ کی جانب سے جاری ہونے والے بیان کے مطابق انہوں نے ان خیالات کا اظہار ہارٹ آف ایشیا کانفرنس کے آغاز سے قبل اس میں شریک ممالک کے اعلی حکام کے اجلاس سے خطاب کے دوران کہی۔ دفترِ خارجہ سے جاری ہونے والے بیان کے مطابق سینیئر حکام کے اجلاس میں افتتاحی خطاب کے دوران سرتاج عزیز نے کہا کہ ہارٹ آف ایشیا کانفرنس علاقائی تعاون اور رابطوں کے لیے ایک موثر پلیٹ فارم ہے۔ان کا کہنا تھا کہ اس اجلاس سے رکن ممالک کو افغانستان میں امن اور استحکام کے لیے نتیجہ خیز سرگرمیوں میں حصہ لینے کا موقع ملتا ہے۔سرتاج عزیز نے خطے کے ممالک پر انسدادِ دہشت گردی، انسداد منشیات اور ڈیزاسٹر مینجمنٹ سمیت متعدد شعبوں میں علاقائی تعاون میں اضافے پر زور دیا۔ افغانستان کے نائب وزیرِ خارجہ حکمت خلیل کرزئی نے بھی افتتاحی اجلاس سے خطاب کیا اور کہا کہ ایک پرامن اور مستحکم افغانستان خطے کے مفاد میں ہے۔ ان کا کہنا تھا کہ دہشت گردی اور انتہاپسندی سے جنگ میں متحدہ کوششوں کی ضرورت ہے اور ان کا ملک دہشت گردی کی تمام اقسام اور اشکال کے خلاف جنگ جاری رکھنے کے لیے پرعزم ہے ۔