لاہور (نیوزڈیسک)سودبارے بیان ،صدرممنون مشکلات کاشکار،عدالت نے بڑاحکم جاری کردیا۔لاہور ہائیکورٹ نے سود سے متعلق دئیے گئے بیان پر صدر پاکستان ممنون حسین کو عہدے سے ہٹانے کے لئے دائر درخواست میں صدر کی تقریر کی ویڈیو طلب کرلی، فاضل عدالت نے درخواست گزار کے وکیل کو آئندہ سماعت پر درخواست کے قابل سماعت ہونے سے متعلق دلائل کیلئے طلب کرلیا ۔گزشتہ روز لاہو رہائیکورٹ کے جسٹس شاہد وحید نے کیس کی سماعت کی۔درخواست گزار مقامی شہری شیخ مبشر عرفان کی درخواست میں کہا گیا ہے کہ26 نومبر کو تقسیم ایوارڈ تقریب میں خطاب کرتے ہوئے صدر پاکستان ممنون حسین نے اپنی تقریر میں علماءکو سود کے معاملے پر گنجائش نکالنے کا کہا،اسلامی جمہوریہ پاکستان کے سربراہ کی حیثیت سے دیا گیا ان کا یہ بیان غیر اسلامی ،غیرآئینی و قانونی اور نظریہ پاکستان کے خلاف ہے جبکہ صدر مملکت یہ دینے کے بعد آئین کے آرٹیکل 63 (1)(g )کی روشنی میں منصب صدرات پر فائز رہنے کے اہل نہیں رہے ،ان کو اس عہدے پر رہنے کا کوئی حق نہیں ہے لہٰذاعدالت انہیں عہدے سے ہٹانے کے احکامات جاری کرئے۔عدالت نے دائر کی گئی درخواست کے قابل سماعت ہونے یا نہ ہونے کے حوالے سے دلائل طلب کرتے ہوئے صدر پاکستان کی جانب سے کی گئی تقریر کی ویڈیو طلب کرتے ہوئے سماعت 8 دسمبر تک ملتوی کر دی۔درخواست میںصدر پاکستان ممنون حسین ،اسپیکر قومی اسمبلی ،چیئرمین سینٹ اور سیکرٹری الیکشن کمیشن کو فریق بنایا گیا ہے۔