کراچی(آن لائن)پاکستان تحریک انصاف کے سربراہ عمران خان کل صبح کراچی میں ایک قریبی دوست کے گھر ناشتے کے لیے پہنچے جہاں ماضی کے مایہ ناز فاسٹ باولر وسیم اکرم اپنی اہلیہ شنیرا ۔تحریک انصاف کے رہنماﺅں ڈاکٹرعارف علوی، عمران اسماعیل، فیصل واڈا سمیت دیگر کئی اہم سیاسی سماجی اور صحافتی شخصیات کو مدعو کیا گیا تھا۔اس موقع پرکپتان نے میڈیا سے بات چیت کرتے ہوئے کہاکہ وسیم اکرم کو سیاست میں آنے کی دعوت نہیں دیتا لیکن ان کے ساتھ ملکر پشاور میں اسٹریٹ چلڈرن کے لئے کرکٹ اکیڈمی بناﺅںگا۔عمران خان نے کہاکہ پرویز مشرف کی آمریت میں بھی کسی حد تک جمہوریت تھی ۔ نواز شریف کی جمہوریت آمریت کی جانب راغب ہے ۔ وزیر اعظم پیکجز کا اعلان کر کے ووٹ خرید رہے ہیں ۔الیکشن کمیشن کے حوالے سے انہوں نے کہاکہ وہ مکمل طور پر جانبداری کا مظاہرہ کر رہا ہے۔ اپنے خلاف درج مقدمات کے حوالے سے عمران خان نے کہاکہ اپنے خلاف ہونے والے مقدمات کی کوئی پراوہ نہیں ہے ۔ ایک سوال کے جواب میں انہوں نے کہاکہ کراچی کے لوگوں کو میں جتنا شکریہ ادا کروں کم ہے، عوام نے ہمیشہ محبت کا اظہار کیا اور حوصلہ مندی کے لیے سڑکوں پر بھی آئے ۔ تحریک انصاف کے سربراہ نے کہاکہ خیبرپختونخوا کی پولیس کو سیاسی اثرورسوخ سے پاک کردیا ہے۔ فاٹا کو خیبرپختونخوا میں شامل کرنے کے لیے عمائدین فاٹا سے مشاورت کی جائیگی۔