اوٹاوا (نیوز ڈیسک) فرانس میں ہونے والی دہشت گردی کے بعد مسلمانوں کے خلاف نفرت اور تعصب میں اضافے کے جو خدشات ظاہر کئے جارہے تھے ان کی عملی مثالیں سامنے آنا شروع ہوگئی ہیں۔ سوشل میڈیا پر سامنے آنے والی ایک تشویشناک ویڈیو اسی سلسلے کی ایک کڑی ہے جس میں ایک خوفناک شکل والا ماسک پہنے ہوئے ایک شخص اعلان کرتا ہے کہ وہ آنے والے دنوں میں مسلمانوں کے خون سے ہولی کھیلے گا اور خصوصاً کیوبک میں آباد عربوں کا صفایا کردے گا۔یہ شخص کہتا ہے کہ اگلے ہفتے سے وہ کیوبک میں آباد عربوں کا قتل عام شروع کردے گا اور ہر ایک ہفتے ایک عرب کو ضرور قتل کرے گا۔ اس شخص کا کہنا ہے کہ کیوبک میں ہر طرف قتل ہوتے نظر آئیں گے۔ مسلمانوں سے نفرت کا اظہار کرتے ہوئے یہ شخص کہتا ہے کہ اسلام نے مغرب کو بہت نقصان پہنچایا ہے اور اس کا بدلہ لینے کے لئے مسلمانوں کو ایک ایک کرکے ختم کیا جائے گا۔ دھمکی دینے والا شخص ویڈیو میں بندوق اٹھائے نظر آتا ہے اور دعویٰ کرتا ہے کہ اس کے ساتھ 10 اور لوگ بھی شامل ہیں جو مسلمانوں کو قتل کریں گے۔ مونٹریال پولیس کا کہنا ہے کہ اس شخص کی دھمکیوں کو انتہائی سنجیدگی سے لیا جارہا ہے اور ویڈیو کی تحقیقات کی جارہی ہیں تاکہ اس میں نظر آنے والے شخص کی شناخت کی جاسکے اور اس کا سراغ لگایا جاسکے، تا ہم خطرناک دھمکیاں دینے والے شخص کے متعلق تاحال کچھ معلوم نہیں کیا جاسکا۔