پیرس(نیوزڈیسک)پیرس میں حالیہ دہشت گردانہ حملوں کے سلسلے میں جرمن پولیس نے اپنے ایک خصوصی آپریشن کے دوران جرمنی کی بلجیم کےساتھ سرحد کے قریب واقع شہر آخن سے تین مشتبہ افراد کو گرفتار کر لیا ہے، جن میں دو خواتین بھی شامل ہیں،غیرملکی خبررساں ادارے کے مطابق جرمن صوبے نارتھ رائن ویسٹ فیلیا کے دارالحکومت ڈسلڈورف سے ملنے والی رپورٹوں کے مطابق گزشتہ جمعے کے روز پیرس میں کم از کم 129 افراد کی ہلاکت کی وجہ بننے والے دہشت گردانہ حملوں کے سلسلے میں جرمن پولیس کی ایک اسپیشل ٹاسک فورس نے آخن میں جو چھاپہ مارا، اس دوران ایک مرد اور دو خواتین کو حراست میں لے لیا گیا۔آخن کا شہر جرمنی، بلجیم اور ہالینڈ کی قومی سرحدوں کے قریب اس علاقے میں واقع ہے، جسے ’تھری کنٹری کارنر‘ یا ’تین ملکی کونہ‘ کہا جاتا ہے۔میڈیارپورٹس کے مطابق جرمن پولیس نے اس بارے میں کسی بھی طرح کی معلومات مہیا کرنے سے انکار کر دیا ہے کہ ملزمان کی شناخت کیا ہے یا ان کا تعلق کس ملک یا ممالک سے ہے۔