لاہور(آئی این پی)لاہور ہائی کورٹ نے گدھے کی کھال وں کی سپرداری کیلئے چینی تاجروں کی درخواست مستر دکر دی۔ بدھ کو لاہور ہائیکورٹ کی جسٹس ارم سجاد گل نے کیس کی سماعت کی۔چینی تاجر گو لنگ ون کے وکیل میاں علی اشفاق نے موقف اختیار کیا کہ دوچینی تاجروں نے قصور کی دین گڑھ نامی کھالوں کی منڈی سے ایک ہزارگدھوں کی کھالیں خرید کر نور الہی نامی شخص کے گودام میں رکھوائیں۔انہوں نے کہا کہ پولیس نے ملی بھگت سے گودام کے مالک اور دوچینی تاجروں کے خلاف تین ہزار گدھوں کو چوری کر کے ان کا گوشت اور کھالیں اتار کر فروخت کے الزامات کے تحت بے بنیاد مقدمہ درج کر لیا۔انہوں نے کہا کہ پولیس کی مدعیت میں درج مقدمے میں نہ تو کوئی گواہ موجود نہ ہی تین ہزار گدھوں کے مالکان منظر عام پر آئے ہیں لہذا عدالت بے بنیاد مقدمے کو ختم کر کے کھالیں واپس کرنے کے احکامات صادر کرئے۔سرکاری وکیل نے گدھوں کی کھالوں کی ایکسپورٹ پر عارضی پابندی کا نوٹیفیکیشن عدالت میں پیش کیا۔انہوں نے کہا کہ کھالوں کی سپرداری کے لئے سول عدالت کا فورم موجود ہے مگر چینی تاجروں نے اس فورم سے رجوع ہی نہیں کیا نہ ہی کھالوں کی ملکیت کا کوئی تحریری ثبوت عدالت میں پیش کیا لہذا درخواست قابل سماعت نہیں ہے۔جس پر عدالت نے چینی تاجروں کی جانب سے دائر درخواست مسترد کر دی۔