اسلام آباد(نیوزڈیسک)پاکستان کی طرف سے پاک افغان بارڈر پر دو طرفہ آمدورفت کو دہشت گردی کے خطرے سے محفوظ بنانے کے لئے انتظامات مکمل کر لئے گئے ہیں۔ پولٹیکل حکام کے مطابق وفاقی وزارت سیفران اور وفاقی وزارت داخلہ نے پہلی بار افغانستان کی جانب سے پاکستان میں غیر قانونی آمدورفت روکنے کی غرض سے بارڈر مینجمنٹ اینڈ کنٹرول پالیسی کے تحت تمام سکیورٹی انتظامات مکمل کر لئے ہیں . پاک افغان سرحد طورخم پر وزارت سیفران کی سفارشات کی روشنی میں وزارت داخلہ کی طرف سے ایف آئی اے . نادرا اور کسٹم پوائنٹس ایک ہی چھت تلے بنا دیئے گئے ہیں . ایک سو میٹر طویل خاردار تاروں سے مزین پیڈسٹیل ٹرمینل بھی قائم کردیا گیا جس سے ہر غیر ملکی کو افغان سرزمین سے قدم اٹھاتے ہی اس ٹرمینل میں داخل ہونا پڑےگا علاوہ ازیں پاکستان افغانستان دونوں اطراف سے ہونے والی تجارت کو بھی قانونی شکل دینے کی غرض سے گڈز ٹرمینل کے قیام کے علاوہ یہاں پاکستان کسٹمز کا دفتر بھی قائم کیا گیا ہے جہاں پر موجود عملہ دو طرفہ تجارت کے ضمن میں اپنی ذمہ داریاں پوری کرے گی ۔ پی اے خیبر ایجنسی شہاب علی خان نے میڈیا کو انتظامات کی اہمیت سے آگاہ کرتے ہوئے بتایا کہ ان اقدامات کی ضرورت گزشتہ کافی عرصے سے محسوس کی جا رہی تھی کیونکہ کسی بھی علاقے یا ملک سے تعلق رکھنے والے افراد یا دہشت گردوں کے پاکستان میں باآسانی داخل ہونے کی بڑی وجہ طورخم بارڈر پر پاکستانی حدود میں کسی قسم کا کوئی بھی چیک پوائنٹ نہ ہونا تھا اور بارڈر مینجمنٹ اینڈ کنٹرول پالیسی کا مقصد جہاں سرحد پار سے دراندازی کو روکنا ہے وہاں اس سے پاک افغان تعلقات کو بہتر بنانے میں بھی بڑی حد تک مدد ملے گی ۔