لاہور(نیوزڈیسک) لاہور ہائیکورٹ نے وزاعظم نواز شریف ، وزیر اعلیٰ پنجاب محمد شہباز شریف ، چیئرمین تحریک انصاف عمران خان ، مسلم لیگ (ق) کے سربراہ چوہدری شجاعت حسین ، پرویز الٰہی سمیت 64سیاستدانوں اور معروف شخصیات کے بیرون ملک اثاثے واپس لانے کے لئے دائر درخواست پر فریقین کے وکلاءکو حتمی بحث کے لئے طلب کر لیا ۔ گزشتہ روز لاہور ہائیکورٹ کے جسٹس خالد محمود خان نے کیس کی سماعت کی۔درخواست گزار بیرسٹر جاوید اقبال جعفری کی جانب سے موقف اختیار کیا کہ نواز شریف،شہباز شریف، حمزہ شہباز شریف ، عمران خان ، چوہدری شجاعت حسین،پرویز الٰہی ،سردار ایاز صادق،اسحاق ڈار،جاوید ہاشمی،فاروق ستار،نجم سیٹھی،میاں منشائ،عاصمہ جہانگیر،شاہد خاقان عباسی،رانا تنویر اور شیخ رشید سمیت دیگر نے چار سو ارب ڈالر غیر قانونی طور پر بیرون ملک منتقل کئے اور قومی خزانے کو ناقابل تلافی نقصان پہنچایا۔نواز شریف کے صاحبزادوں نے برطانیہ میں ایک سو انچاس جائیدادیں خریدیں جبکہ درخواست میں فریق بنائے گئے تمام سیاستدانوں نے بیرون ملک اثاثے بنا کر ملک کو کنگال کیا۔ لہٰذا معزز عدالت سے استدعا ہے کہ ان سیاستدانوں کی طرف سے بیرون ملک بینکوں میں رکھے گئے پیسے وطن واپس لا کر ملک کی حالت تبدیل کی جا سکتی ہے اور حقیقی انقلاب برپا کیا جا سکتا ہے۔ فاضل عدالت نے درخواست گزار کا موقف سننے کے بعد کیس کی مزید سماعت 27نومبر تک ملتوی کرتے ہوئے فریقین کے وکلاءکو بحث کے لئے طلب کر لیا۔