اسلام آباد(نیوز ڈیسک) آبِ گم کے سٹیشن کے قریب جعفرایکسپریس پٹڑی سے اترگئی جس کے نتیجے میں12 افراد جاں بحق جبکہ100 سے زائد زخمی ہوگئے ہیں جبکہ ٹرین کے انجن اور 5 بوگیاں تباہ ہوگئی ہیں زخمیوں کو بوگیوں سے نکالنے کیلئے امدادی کارروائیاں جاری ہیں۔تفصیلات کے مطابق راولپنڈی سے کوئٹہ جانے والی جعفرا یکسپریس ضلع بولان کے علاقے آبِ گم کے سٹیشن پر پہنچی تو اس کے بریک فیل ہوگئے۔ بریک فیل ہونے پر ڈرائیور نے ٹرین کو ہنگامی حالات کیلئے بنائی گئی پٹڑی ”جہنم لائن“ پر چڑھا دیا جس پر رکنے کی بجائے ٹرین کی 4 بوگیاں پٹڑی سے اتر گئیں جن میں سے 2 بوگیاں الٹ گئیں۔ بوگیاں الٹنے کے باعث ٹرین کے ڈرائیور محمد ایوب ، اسسٹنٹ ڈرائیور وسیم اقبال اور 2 پولیس اہلکاروں سمیت 9 افراد جاں بحق ہوگئے جبکہ100 سے زائد مسافر زخمی ہوگئے ہیں۔ زخمیوں کو سول ہسپتال مچھ منتقل کردیا گیا ہے۔ٹرین کے الٹتے ہی مقامی لوگوں نے اپنی مدد آپ کے تحت امدادی کارروائیاں شروع کردیں جبکہ ایف سی اور دیگر سرکاری اداروں کی امدادی ٹیمیں بھی جائے وقوعہ پر پہنچ گئیں اور امدادی کارروائیاں شروع کردیں۔لیویز حکام کے مطابق جعفرایکسپریس میں 9 سو سے ایک ہزار افراد سوار ہوتے ہیں۔ ٹرین کی بوگیاں الٹنے کے باعث متعدد افراد زخمی ہوئے ہیں جن میں سے اکثر لوگ بوگیوں میں پھنسے ہوئے ہیں جس کی وجہ سے ہلاکتوں میں اضافے کا خدشہ ہے۔ لیویز حکام کے مطابق حادثے کی وجہ سے جعفرا یکسپریس کی 5 بوگیاں اور انجن تباہ ہوگئے ہیں۔