راولپنڈی (نیوزڈیسک)پاک فوج کے سربراہ جنرل راحیل شریف نے کہا ہے کہ پاک فوج اور ایف سی کے بلند حوصلے آپریشن ضرب عضب میں کامیابیوں کی بنیاد بنے ہیں،پوری قوم کو پاکستان کی مسلح افواج پر غیر متزلزل بھروسہ ہے۔آئی ایس پی آر کے مطابق آرمی چیف نے ایف سی ہیڈکوارٹر پشاور کا دورہ کیا ،جس میں ایف سی کی استعداد کار بڑھانے کیلئے ساز و سامان اور افرادی قوت کا جائزہ بھی لیا۔ جنرل راحیل شریف نے پاک افغان سرحد پر تعاون کو مربوط بنانے پر زور دیا اور کہا کہ خطے میں امن و استحکام کے لئے یہ مربوط تعاون لازمی شرط ہے۔ آرمی چیف نے کہا کہ پاکستانی قوم کا فوج پر غیر متزلزل اعتماد ہے اور قوم فرض کی ادائیگی میں پاک فوج کی قربانیوں کو قدر کی نگاہ سے دیکھتی ہے۔ قوم کا محافظ ہونے پر فخر ہے توقعات پر پورا اتریں گے۔آئی ایس پی آر کے جاری بیان کے مطابق آرمی چیف کو دورے کے موقع پر آئی جی ایف سی نے آپریشنل تیاریوں اور کارروائیوں میں پیش رفت پربریفنگ دی۔آرمی چیف نے ایف سی اہلکاروں کی کامیابیوں اور قربانیوں کو خراج تحسین پیش کرتے ہوئے کہا کہ ایف سی اہلکار دہشت گرد کے خلاف جنگ میں بہادری کی نئی داستانیں رقم کررہے ہیں۔آرمی چیف جنرل راحیل شریف نے کہا کہ قوم مسلح افواج کی قربانیوں کو قدر کی نگاہ سے دیکھتی ہے، ایف سی میں جوانوں کی بھرتیوں میں میرٹ کو یقینی بنایا جائے،ادارے کو موثر بنانے کیلئے بہترین تربیت پر توجہ مرکوز رکھنا ہوگی۔