اسلام آباد (خصوصی نمائندہ) بھارتی فضائیہ کی جانب سے رات کی تاریکی میں کیے گئے اچانک حملے کے بعد پاکستان نے فوری اور مؤثر ردعمل دیتے ہوئے دشمن کے دو جنگی طیارے تباہ کر دیے۔ دفاعی ذرائع کے مطابق پاکستانی فضائیہ کے جانبازوں اور بھارتی طیاروں کے درمیان سخت فضائی جھڑپ ہوئی، جس میں پاکستان نے اپنی فضائی برتری کا عملی ثبوت پیش کیا۔

اطلاعات کے مطابق سب سے پہلے ایک بھارتی طیارہ نشانے پر آیا، اور اس کے فوراً بعد دوسرا طیارہ بھی مار گرایا گیا۔ ذرائع نے انکشاف کیا ہے کہ ان میں ایک رافیل طیارہ بھی شامل تھا، جو بھارت نے فرانس سے حاصل کیا تھا۔ بھارتی حکومت اسے اپنی فضائی قوت کا اہم ہتھیار تصور کر رہی تھی، مگر پاکستانی پائلٹس نے دشمن کی یہ خوش فہمی دور کر دی۔

مزید معلومات کے مطابق رافیل طیارہ پاک فضائیہ کے جدید جے-10 سی جنگی طیارے نے نشانہ بنایا، جس سے یہ پیغام واضح ہو گیا کہ پاکستان کی فضائی حدود میں کسی بھی قسم کی جارحیت کو ہرگز برداشت نہیں کیا جائے گا۔

یہ امر بھی قابل ذکر ہے کہ بھارتی حملوں میں سیالکوٹ، شکرگڑھ، کوٹلی، مظفرآباد سمیت مختلف علاقوں کو نشانہ بنایا گیا، جس کے نتیجے میں کم از کم 26 شہری شہید اور 46 زخمی ہوئے۔ ان حملوں میں رہائشی علاقوں، عبادت گاہوں اور بنیادی ڈھانچے کو نقصان پہنچا، جس پر ملک بھر میں غم و غصے کی فضا ہے۔