اسلام آباد (این این آئی) سینیٹر فیصل واوڈا نے کہا ہے کہ جیل میں عمران خان کی زندگی خطرے میں ہے بشری اور حواریوں نے ان کا سودا کردیا،ان کی گرفتاری لازمی ہونی چاہئے۔ نجی ٹی وی سے گفتگو کرتے ہوئے فیصل واوڈا نے کہا کہ بشری بیگم نے بہت خطرناک بیانئے کو جنم دیا اور پھر حکومت کی غیر ذمہ داراور نااہل ٹیم نے اس کو تاثر ایسا دیا کہ وہ بھی جاگ پنجابی جاگ کی سیاست کرنے آرہے ہیں، قومیت کو آمنے سامنے کرکے تاثر دیاگیا کہ شائد ریاست، آرمی، اسٹبلشمنٹ پٹھانوں کے خلاف ہے۔
انہوں نے کہا کہ دوسری طرف یہ تاثر بھی دیا گیا کہ تحریک انصاف کے آگے بھی ریاست، اسٹبلشمنٹ اور فوج کھڑی ہے جبکہ ایسا نہیں ہے کیونکہ وہ نہ کسی سیاسی جماعت کے خلاف ہیں نہ ساتھ ہیں۔انہوں نے کہا کہ پمز ہسپتال میں تین افراد کے سرٹیفکیٹس آئے جنہیں گولیاں لگی ہیں، میں بڑا کلیئر ہوں کہ انہیں پی ٹی آئی نے مارا ہے۔انہوں نے کہا کہ مراد سعید اگر پکڑا گیا تو بہت سارے لوگ پھانسی کے پھندے پر چڑھ جائیں گے جن میں بانی عمران خان اور فیض حمید بھی شامل ہیں۔انہوں نے کہا کہ بشری بی بی کی گرفتاری لازمی ہونی ہے، اس میں کوئی غلط فہمی نہیں ہونی چاہئے، بشری بی بی پر قتل کی ایف آئی آر ہے انہیں کیسے چھوڑ سکتے ہیں۔
