اوکاڑہ(نیوزڈیسک)پاکستان تحریک انصاف کے چیرمین عمران خان نے کہاہے کہ نوازشریف پاکستان کے کرپٹ ترین آدمی ہیں ۔انہو ںنے کہاکہ مجھے فخر ہے کہ میں نے پاکستانی قوم کو نئی سوچ دی۔ میں نے قوم کو ایک آزاد قوم بنانے کی کوشش کی اور قوم کے جاگنے پر اللہ کا شکر گزار ہوں۔ عمران خان نے کہا قوم پیسے اور تگڑی فوج سے نہیں بلکہ انصاف ملنے سے اوپر جاتی ہے۔عمران خان نے این اے 144میں جلسہ عام سے خطاب کرتے ہوئے کہاکہ کفر کا نظام چل سکتا ہے لیکن ظلم اور ناانصافی کا نہیں چل سکتا۔انہوں نے الزام لگایاکہ ہمارا وزیراعظم آئی ایم ایف سے بھکاریوں کی طرح قرضے مانگتا ہے۔ حکمرانوں نے بھیک مانگ مانگ کر ہر پاکستانی کو مقروض کر دیا۔عمران خان نے کہا مغرب اور پاکستان میں انصاف کے نظام کا فرق ہے۔ مغرب میں لوگوں کو انصاف ملتا ہے لیکن پاکستان میں امیر اور غریب کا فرق ہے۔ ملک میں طاقت ور ہر ناجائز کام کر سکتا ہے۔ انہوں نے کہا میاں صاحب حافظ آباد کا جلسہ دیکھ کر ڈر گئے اور خوف میں آ کر کسان پیکج دیدیا۔تحریک انصاف کے چیرمین عمران خان نے وزیراعظم نواز شریف پر الزام لگاتے ہوئے کہا کہ آپ پاکستان کے کرپٹ ترین آدمی ہیں کیونکہ آپ نے منی لانڈرنگ اور ٹیکس چوری کی ہے۔ میاں صاحب آپ سے تو آصف زرداری بہتر ہے جس نے 480 ارب کا سرکلر ڈیٹ چھوڑا اور آپ نے 615 ارب کا کر دیا عمران خان نے کہا نندی پور میں ڈاکہ مارا گیا اور پراجیکٹ کو 22 ارب کی بجائے 84 ارب تک پہنچا دیا اور جو پانچ دن بعد بند ہو گیا۔جلسہ عام سے خطاب کرتے ہوئے پی ٹی آئی کے وائس چیرمین شاہ محمود قریشی اقتدار کے لیے نہیں تبدیلی کے لیے پی ٹی آئی میں آیا ہے۔ ان کا مزید کہنا تھا آج لڑائی ایک اور دو نمبر سیاست کی ہے اور پچھلے کئی سالوں سے دو نمبری کی سیاست ہو رہی ہے۔ جب اصل تھیلے کھلوائے تو اس میں بلے کو مہریں لگی ہوئی تھیں۔ ہم پاکستان کی سیاسی سوچ بدلنے آئے ہیں کیونکہ ہمیں غلامی نہیں عوام کی خدمت کرنی ہے۔