لندن(این این آئی )انگلینڈ کے علاقے ساتھ پورٹ میں مقامی مسجد کے باہر سفید فام انتہاپسند گروپ کے اراکین اور پولیس کے درمیان جھڑپیں، مشتعل مظاہرین نے مسجد کے باہر کھڑی پولیس وین کو آگ لگا دی۔پولیس کی جانب سے مشتعل مظاہرین کو مسجد کی طرف پیش قدمی سے روکنے کی کوشش کی گئی جس پر انتہا پسند عناصر کی جانب سے مسجد اور پولیس پر پتھرائو کیا گیا۔علاقے میں کشیدہ صورتحال پر قابو پانے کیلئے اینٹی رائٹز پولیس کو طلب کرلیا گیا۔
سائوتھ پورٹ میں مسجد کے باہر پر تشدد مظاہروں پر بیان جاری کرتے ہوئے برطانوی وزیراعظم کئیر اسٹارمر نے کہا کہ پر امن ویجل کو پرتشدد اور غنڈہ گرد عناصر کی جانب سے ہائی جیک کرنے کی کوشش ساتھ پورٹ کی غمزدہ عوام کی توہین کے مترادف ہے۔انہوں نے کہا کہ پرتشدد واقعات میں ملوث عناصر کو قانون کی بھرپور قوت کا سامنا کرنے پڑے گا۔ساتھ پورٹ میں گزشتہ روز چاقو زنی کی واردات میں تین بچیاں ہلاک ہوگئی تھیں، سوشل میڈیا پر فیک پوسٹ گردش کررہی تھی کہ حملہ آور ایک شامی پناہ گزین ہے جس کے بعد دائیں بازو کے انتہا پسند گروپس نے احتجاج کا اعلان کیا تھا۔
