تل ابیب (این این آئی )اسرائیل کی انٹیلی جنس ایجنسی موساد نے اٹلی میں اختتام ہفتہ پر کشتی کے حادثے میں اپنے ایک ریٹائرڈ ایجنٹ کی ہلاکت کی تصدیق کی ہے۔میڈیارپورٹس کے مطابق اٹلی کے شمال میں واقع قصبے لیسانزا میں ایک جھیل میں کرائے پر لی گئی ایک ہائوس بوٹ میں سابق ایجنٹ سمیت 22 افراد تفریح کررہے تھے۔

اس دوران میں اچانک طوفان آجانے کی وجہ سے ان کی کشتی الٹ گئی اور اس میں سوار چار افراد ہلاک ہوگئے تھے۔ان میں موساد کا ایک ریٹائرڈ ایجنٹ بھی شامل تھا۔اس حادثے میں دو اطالوی انٹیلی جنس ایجنٹ اور کشتی کے دورکنی عملہ میں شامل ایک روسی خاتون بھی ہلاک ہو گئی ۔اسرائیلی وزیر اعظم کے دفتر سے موساد کی جانب سے جاری کردہ ایک بیان کہا گیا کہ نامعلوم ایجنٹ کی باقیات تدفین کے لیے اسرائیل واپس بھیج دی گئی ہیں۔