اسلام آباد (نیوز ڈیسک) بھارتی کرکٹ کے لیجنڈ سچن ٹنڈولکر کی بیٹی، سارہ ٹنڈولکر، ایک مرتبہ پھر خبروں کی زینت بن گئی ہیں۔ اس بار ان کا نام بھارتی فلم انڈسٹری کے معروف چہرے سدھانت چترویدی کے ساتھ جوڑا جا رہا ہے۔
کئی برسوں سے یہ قیاس آرائیاں جاری تھیں کہ انڈین کرکٹ ٹیم کے نوجوان کھلاڑی اور آئی پی ایل میں گجرات ٹائٹنز کے کپتان شبمن گل اور سارہ ٹنڈولکر کے درمیان قریبی تعلقات ہیں، تاہم دونوں نے کبھی بھی کھلے عام اس تعلق کی تصدیق یا تردید نہیں کی تھی۔
رواں آئی پی ایل سیزن کے ایک میچ کے دوران جب شبمن گل سے کمنٹیٹر اور سابق نیوزی لینڈ کرکٹر ڈینی موریسن نے لائیو کمنٹری کے دوران شادی سے متعلق سوال کیا کہ “کیا تم جلدی شادی کرنے جا رہے ہو؟” تو شبمن گل کا ردعمل نہایت حیران کن تھا، اور انہوں نے مختصر جواب دیا: “نہیں۔”
اسی دوران، مداحوں نے یہ بھی نوٹ کیا کہ سارہ اور شبمن نے انسٹاگرام پر ایک دوسرے کو اَن فالو کر دیا ہے، جس سے ان کے درمیان دوری کی قیاس آرائیوں کو مزید تقویت ملی۔
حالیہ دنوں فلمی جریدے “فلم فیئر” نے ایک رپورٹ میں انکشاف کیا ہے کہ سارہ ٹنڈولکر اب ممکنہ طور پر بالی ووڈ کے ابھرتے ہوئے اداکار سدھانت چترویدی سے رشتہ قائم کر چکی ہیں۔ رپورٹ میں دعویٰ کیا گیا ہے کہ دونوں کے قریبی حلقے اس بات کی تصدیق کر رہے ہیں۔
یاد رہے کہ سدھانت چترویدی اس سے قبل امیتابھ بچن کی نواسی، نویہ نویلی نندا، کے ساتھ بھی تعلق میں تھے، مگر یہ رشتہ وقت کے ساتھ اختتام کو پہنچ گیا۔
نہ سارہ اور نہ ہی سدھانت کی جانب سے ان خبروں پر باضابطہ ردعمل سامنے آیا ہے، تاہم سوشل میڈیا پر ان کے تعلقات سے متعلق قیاس آرائیاں زور پکڑ رہی ہیں۔
