ریاض (این این آئی)سعودی عرب نے افغانستان ہیومینٹیرین ٹرسٹ فنڈ کی معاونت کے لیے تین کروڑ ڈالرمالیت کی گرانٹ مہیا کی ہے۔میڈیارپورٹس کے مطابق رپافغانستان کا یہ انسانی ٹرسٹ فنڈ اسلامی تعاون تنظیم (او آئی سی)کے ساتھ مل کر اسلامی ترقیاتی بینک کی
نگرانی میں کام کرتا ہے۔اس کو دی گئی گرانٹ سعودی عرب کی جانب سے برادرممالک کوانسانی اور امدادی کوششوں کے ضمن میں دی جانے والی امداد کا حصہ ہے۔ اس مالی امداد کا مقصد افغانستان کے عوام کے مصائب کو کم کرنے، انسانی صورت حال کو مزید ابترہونے سے بچانے اور کسی بھی ممکنہ معاشی تباہی کوروکنے میں معاونت مہیاکرنا ہے کیونکہ اگر افغانستان معاشی طور پردیوالیہ ہوتا ہے تویہ ایک ایسا دھڑن تختہ ہوگا جو ممکنہ طور پرعلاقائی اور بین الاقوامی استحکام اور امن پر اثرانداز ہوسکتا ہے۔ گذشتہ دہائیوں کے دوران میں افغانستان میں انسانی بھلائی، صحت کی دیکھ بھال ، تعلیمی اور غذائی تحفظ کے منصوبوں کے لیے سعودی عرب کی جانب سے مہیا کردہ کل امدادی رقم ایک ارب ریال سے تجاوزکر گئی ہے۔افغانستان کے بارے میں او آئی سی کے ایلچی طارق علی بخت نے بتایا کہ سعودی عرب نے افغانستان کواب تک کسی بھی دوسرے ملک کے مقابلے میں سب سے زیادہ امداد مہیا کی ہے۔
