لودھراں (این این آئی)تحریک انصاف کے مرکزی رہنما جہانگیر ترین نے کہا ہے کہ صادق سنجرانی بہت اچھا کام کر رہے ہیں، وہی چیئرمین سینیٹ رہیں گے،(ن)لیگ اور پیپلز پارٹی کے کئی رہنما سمجھتے ہیں کہ صادق سنجرانی کے خلاف تحریک سیاسی انتقام ہے۔ میڈیا سے گفتگو کرتے ہوئے جہانگیر خان ترین نے کہا کہ وزیراعظم عمران خان امریکی صدر ڈونلڈ ٹرمپ کی خصوصی دعوت پر امریکا گئے ہیں،وزیراعظم کے دورہ امریکا سے دونوں ملکوں کے درمیان دوریاں کم ہوں گی۔

جہانگیر ترین نے کہا کہ (ن)لیگ اور پیپلز پارٹی کے اپنے کئی رہنما اربوں کی کرپشن کرتے پکڑے گئے ہیں، اپوزیشن رہنماؤں کے کرتوت اب سامنے آ رہے ہیں، احتساب کا عمل سب کے لیے اور بلا تفریق ہوگا۔انہوں نے کہاکہ وزیراعظم عمران خان کرپشن کے خلاف جنگ کر رہے ہیں جبکہ اپوزیشن لوٹ مار سے جمع شدہ دولت بچانے کی ناکام کوشش کر رہی ہے۔ جہانگیر ترین نے فاٹا کے پرامن الیکشن کے انعقاد پر فوج اور انتظامیہ کو بھی مبارکباد پیش کی۔