اسلام آباد(مانیٹرنگ ڈیسک)خدشہ لگا رہتا ہے کہ کہیںپاکستانی معیشت مزید نہ گر جائے، ڈرتا ہوں کہ کہیں مزید مہنگائی بڑھنے اور قوت خرید کم ہو جانے کے باعث عوام سڑکوں پر ہی نہ نکل آئیں، حکومت میں غلطیاں ہیں ، پی ٹی آئی میں اسد عمر سے بہتر کوئی اور وزیر خزانہ نہیں، ہر جمعہ کو کہہ دیا جاتا ہے کہ وزیر خزانہ جا رہا ہے،شیخ رشید کی نجی ٹی وی سے گفتگو۔ تفصیلات کے
مطابق نجی ٹی وی پروگرام میں گفتگو کرتے ہوئے عوامی مسلم لیگ کے سربراہ اور حکومت کے اتحاد وفاقی وزیر ریلوے شیخ رشید احمد نے تحریک انصاف کی حکومت میں غلطیوں کا اعتراف کرتے ہوئے معیشت کے حوالے سے بھی شدید خدشات اور تحفظات کا اظہار کیا ہے۔ سوالات کا جواب دیتے ہوئے شیخ رشید کا کہنا تھا کہ میں مانتا ہوں کہ حکومت غلطیاں کر رہی ہے اورمجھے خدشہ لگا رہتا ہے کہ کہیں پاکستانی معیشت مزید نہ گر جائے ، ڈرتا ہوں کہ کہیں مزید مہنگائی بڑھنے اور لوگوں کی قوت خرید کم ہو جانے کے باعث عوام سڑکوں پر ہمارے خلاف نہ نکل آئیں تاہم مجھے پی ٹی آئی میں اسد عمر سے بہتر وزیر خزانہ نظر نہیں آتا ، ہر جمعہ کو کہہ دیا جاتا ہے کہ وزیر خزانہ جا رہا ہے۔ بلاشبہ حکومتی وزیروں کے بیانات ایک دوسرے سے متصادم اور متضاد ہیں ۔ واضح رہے کہ اس سے قبل شیخ رشید اپنے سیاسی حریف شہباز شریف کی بطور چیئرمین پبلک اکائونٹس کمیٹی تعیناتی کے خلاف حکومتی فیصلے کے برخلاف سپریم کورٹ جانے کا اعلان کر چکے ہیں۔ ایک انٹرویومیں عوامی مسلم لیگ کے سربراہ و وفاقی وزیر ریلوے شیخ رشید نے کہا تھا کہ شہباز شریف کو چیئرمین پبلک اکاؤنٹس کمیٹی لگانے والے پچھتائیں گے۔انہوں نے کہا کہ پبلک اکاؤنٹس کمیٹی کی چیئرمین شپ کے معاملے پر عمران خان کے ساتھ نہیں ہوں، ہم کوئی غنیمت کا مال تھے کہ 7سال جیل کاٹی اور
3سال میں پروڈکشن آرڈر ہوئے۔انہوں نے کہاکہ لعنت ہے ایسے نظام پر جس میں چور اور چوکیدار ایک ہی صف میں کھڑے کردیئے گئے ہیں، میں سپریم کورٹ جا رہا ہوں، جہاں پاناما کا کیس لڑا اور اب دوسرا لڑنے جا رہا ہوں ۔وفاقی وزیر نے کہا کہ سانپ اور شہباز شریف اکھٹے آرہے ہوں تو پہلے سیاسی طور پر شہباز شریف کو مارو، یہ چوری بھی کریں اور اپوزیشن لیڈر بھی بنیں۔
انہوں نے کہاکہ اسپیکر کا فیصلہ ہے میں کچھ نہیں کہتا لیکن ریمانڈ کے وقت چیئرمین پی اے سی بنایا جانا درست نہیں۔انہوں نے کہا کہ اگر یہ نظام چلتا تو یہ جیل میں ہوتے اور نیا پاکستان یہ ہے کہ قلندر باہر پھریں، قانون کے تحت چور اندر جائیں، عمران خان کا حقیقی دوست ہوں اور دوست وہ ہے جو صحیح مشورہ دے۔شیخ رشید نے کہا کہ شہباز شریف کو چیلنج کرتاہوں ٹی وی پر آجائیں ثابت کروں گا کہ وہ این آر او کے متلاشی ہیں اورپی اے سی چیئرمین بننا اس کا پہلا قدم ہے۔ایک سوال کے جواب میں انہوں نے کہا کہ رانا ثناء اللہ نیب جائیں یا الیکشن کمیشن یہ ان کا حق ہے۔
