لاہور ( این این آئی)خیبرپختونخوا میں تحریک انصاف کے سب سے بڑے اور کامیاب ترین منصوبے کو پورے ملک میں شروع کرنے کے لئے بڑا قدم اُٹھالیاگیا، انصاف ہیلتھ کارڈ کا اجراء پورے ملک میں کرنے کے مطالبے کی قرارداد پنجاب اسمبلی سیکرٹریٹ میں جمع کروا دی گئی ۔تحریک انصاف کی رکن صوبائی اسمبلی مسرت جمشید چیمہ کی جانب سے جمع کرائی گئی قرار داد کے متن میں کہا گیا ہے کہ صوبہ خیبر پختونخواہ

میں پی ٹی آئی کی حکومت نے انصاف ہیلتھ کارڈ جاری کیا جس کی بدولت عوام الناس کو 3 لاکھ روپے تک بغیر کسی تکلیف و خرچ کے بہتر اور بروقت علاج کی سہولت میسر ہوئی جس پرپاکستان تحریک انصاف کی قیادت مبارکباد کی مستحق ہے۔اب یہی سہولت پاکستان کے ہر شہری کو حاصل ہونی چاہئے۔ قرارداد میں حکومت سے مطالبہ کیا گیا ہے کہ ملک بھر میں انصاف ہیلتھ کارڈ کا فی الفور اجرا ء کیا جائے۔