لاہور( این این آئی)مسلم لیگ (ن) کے مرکزی رہنما و حلقہ این اے 131سے امیدوار خواجہ سعد رفیق نے کہا ہے کہ شہباز شریف کی گرفتاری بزدل حکمرانوں کی ہار ہے ،عمران خان ہر شوق پورا کر لو تاکہ آپ کی کوئی حسرت نہ رہ جائے ، جب عمران خان گرے گا تو کوئی اٹھانے نہیں آئے گا، ڈیڑھ ماہ میں ہی غریبوں کی زندگی اجیرن کرنے والے ضمنی انتخابات میں ووٹ نہیں لے سکتے ،

شیر کو ووٹ ڈالنا اس پر پہرہ دینا اور نتیجہ لے کر آنا ہے۔ ان خیالات کا اظہار انہوں نے انتخابی مہم کے دوران جلسے سے خطاب کرتے ہوئے کیا ۔ خواجہ سعد رفیق نے کہا کہ گرفتار شخص کی چین سے ترکی تک لوگ تعریف کرتے ہیں ، چین والے شہباز شریف کی سپیڈ کے معترف ہیں۔(ن) لیگ عام آدمی کی جماعت ہے ،سی این جی اسٹیشنز سے لائنیں مسلم لیگ(ن) نے ہٹوائیں ، ہم عوا م کیلئے کام کرتے ہیں تو تمہیں تکلیف ہوتی ہے ۔ انہوں نے کہا کہ شہباز شریف کی گرفتاری بزدل حکمرانوں کی ہار ہے ، بزدل دشمن ہمیشہ پیچھے سے وار کرتا ہے، دشمن کو باندھ کر مارتا ہے جبکہ شیر سامنے سے آکر مقابلہ کرتا ہے ۔ عمران خان ہر شوق پورا کر لو تاکہ آپ کی کوئی حسرت نہ رہ جائے ۔ جب عمران خان گرے گا تو کوئی اٹھانے نہیں آئے گا۔ انہوں نے کہا کہ سفر عمران خان دانشمند ہوتا تو سیاسی انتقام کی بجائے وعدے پورے کرتا۔حکمرانی دل و دماغ پر ہوتی ہے نہ کہ سڑکوں اور عمارتوں کے ذریعے ہوتی ہے ۔ کیا پاکستان میں تبدیلی لوٹوں کے ذریعے آئے گی؟۔تبدیلی والوں نے موٹر سائیکل کا چالان بھی بڑھا دیا، انہیں کوئی ووٹ کیسے دے گا۔ ڈیڑھ ماہ میں اشیائے خوردونوش سمیت ہر چیز کی قیمتیں بڑھا دی گئی ہیں ، غریب کیلئے زندگی گزارنا اجیرن ہو گیا ہے ۔انہوں نے کہا کہ میرے مقابلے میں ایک لوٹے کو میدان میں اتارا گیا ہے،اس مرتبہ ڈٹ کر اپنے مینڈیٹ پرپہرا دینا ہے۔