لاہور ( این این آئی) قومی احتساب بیورو (نیب ) لاہور نے سابق ڈائریکٹر جنرل لاہور ڈویلپمنٹ اتھارٹی احد خان چیمہ کیخلاف بدعنوانی کا ریفرنس دائر کرنے کی منظوری دیدی جبکہ فواد حسن فواد کیخلاف انویسٹی گیشن کی بھی منظوری دی گئی۔گزشتہ روز قومی احتساب بیورو (نیب) ،لاہور میں ریجنل بورڈ میٹنگ کا اجلاس منعقد ہوا جس کی صدارت ڈائریکٹر جنرل نیب لاہور شہزاد سلیم نے کی۔ اجلاس میں ڈپٹی پراسیکیوٹرنیب لاہور ڈائریکٹرز اور سینئر افسران

نے شرکت کی ۔ ریجنل بورڈ میٹنگ لاہور میں ملزم احد خان چیمہ کے خلاف آمدن سے زائد تقریبا70کروڑ مالیت کے اثاثے بنانے کے الزام میں بدعنوانی کا ریفرنس دائر کرنے کی منظوری دی گئی۔ ملزم احد خان چیمہ کے خلاف نیب لاہور پہلے ہی آشیانہ کرپشن کیس میں ریفرنس دائر کر چکا ہے جو کہ زیر سماعت ہے۔قومی احتساب بیورو لاہور میں ریجنل بورڈ میٹنگ کے اجلاس میں ملزم فواد حسن فواد کیخلاف انویسٹی گیشن کی منظوری دی گئی۔