بیجنگ (آئی این پی ) چین نے پاکستان اور بھارت پر پر امن طریقے اور باہمی مذاکرات سے تنازعات ختم کرنے پر زوردیتے ہوئے کہا ہے کہ ان دونوں کے درمیان بہتر تعلقات جنوبی ایشیاء سمیت پورے دنیا کے امن اور ترقی کے لئے اہم ہیں ۔ بدھ کو معمول کی پریس بریفنگ کے دوران چین کی وزارت خارجہ کے ترجمان گینگ شوانگ نے ایک سوال کے جواب میں کہا کہ پاکستان اور بھارت جنوبی ایشیاء میں انتہائی دو اہم ممالک ہیں اور اس بات کو سراہا جائے گا اگر دونوں اپنے

دو طرفہ تنازعات کو پر امن طریقے سے حل کر لیتے ہیں ۔ انہوں نے کہا کہ پاکستان اور بھارت کے درمیان تعلقات میں بحالی کی ثابت قدمی کی پیش رفت خطے اور پوری دنیا کے امن و ترقی کے لئے انتہائی اہمیت کی حامل ہے ۔ انہوں نے کہا کہ ہم مخلصانہ طور پر یہ امیدکرتے ہیں کہ دونوں ممالک آپس میں بات چیت کا عمل بڑھائیں گے اور مناسب طریقے سے اختلافات سے نمٹیں گے اپنے تعلقات بہتر بنائیں گے اور مشترکہ طور پر خطے کے امن و استحکام میں اپنا کردار ادا کریں گے ۔ امریکہ چین تجارتی جنگ کے سوال پر ترجمان نے کہا کہ سٹیٹ کونسل انفارمیشن آفس نے چین امریکہ تجارتی اختلافات اور چین کی پوزیشن کے حوالے سے وائٹ پیپر شائع کیا ہے اس حوالے سے چین کی پوزیشن انتہائی واضح ہے ۔ انہوں نے کہا کہ امریکہ کی جانب سے چین کو اپنے تجارتی خسارے ، ملازمتوں کے مواقع نہ ہونے اور ڈبلیو ٹی او تک چین کی رسائی کا ذمہ دار قرار دینا بلا جواز ہے ۔ انہوں نے کہا کہ چین امریکہ اقتصادی تعاون دونوں ممالک کے مفاد میں ہے ۔ گزشتہ چالیس سالوں کے دوران امریکہ چین اقتصادیات اور تجارتی تعاون دونوں ملکوں کے عوام کے لئے باہمی طور پر فائدہ لایا ۔ انہوں نے کہا کہ دونوں اطراف کو تجارتی مسائل مذاکرات ، مساواتی مشاورت ، عزت ووقار ، باہمی احترام سے حل کرنے چاہئیں نہ کہ تحفظ کے اقدامات اور طرف داری کے ذریعے ۔ انہوں نے کہا کہ جنرل اسمبلی میں امریکہ کا اپنا نقطہ نظر تھا اور ہر ایک نے اس کو دیکھا ہے ۔