اسلام آباد (این این آئی) تحریک انصاف کے رہنما اعظم خان سواتی نے کہا ہے کہ الیکشن سے قبل شہبازشریف کو آر ٹی ایس کی ناکامی کا علم کیسے ہوا؟میڈیا سے گفتگو میں اعظم سواتی نے آرٹی ایس سسٹم کی ناکامی پر تحقیقات اور شہبازشریف کو شامل تفتیش کرنے کا مطالبہ کیا ۔انہوں نے کہا کہ شہبازشریف نے آدھی رات سے پہلے ہی کہہ دیا تھا کہ آرٹی ایس سسٹم ناکام ہوگیا ہے ۔پی ٹی آئی رہنما
نے کہا کہ سابق وزیراعلیٰ پنجاب اور ن لیگ کے صدر سے پوچھا جائے کہ انہوں نے آر ٹی ایس کی ناکامی کا بیان کس بنیاد پر دیا تھا؟اعظم خان سواتی نے کہا کہ پی ٹی آئی اس نظام کی ناکامی کی تہہ میں جانا چاہتی ہے اور اس حوالے سے سابق وزیراعلیٰ کو شامل تفتیش کیا جانا ضروری ہے۔انہوں نے کہا کہ اپوزیشن کی تمام جماعتیں جان بوجھ کر شفاف انتخابات کو متنازع بنانا چاہتی ہیں۔
