اسلام آباد (نیوز ڈیسک)  اسلام آباد کچہری دھماکے سے قبل افغانستان سے کی جانے والی سوشل میڈیا پوسٹس نے کئی سنجیدہ سوالات کو جنم دے دیا ہے۔
ذرائع کے مطابق کچہری میں دھماکا دوپہر 12 بج کر 45 منٹ پر ہوا، تاہم افغانستان کے متعدد سوشل میڈیا اکاؤنٹس پر صبح ہی سے اسلام آباد سے متعلق پراسرار پیغامات شیئر کیے جا رہے تھے۔
سیکیورٹی ذرائع نے بتایا کہ طالبان سے منسلک ایک “ایکس” (سابق ٹوئٹر) اکاؤنٹ “خراسان العربی” کی جانب سے دھماکے کے وقت کے آس پاس ایک پوسٹ کی گئی، جو اس واقعے سے پہلے سے منصوبہ بندی کی نشاندہی کرتی ہے۔ اطلاعات کے مطابق صبح 6 بج کر 45 منٹ پر اسی اکاؤنٹ سے “Coming Soon Islamabad” کے الفاظ کے ساتھ ایک پوسٹ کی گئی تھی۔
ذرائع کے مطابق ماضی میں بھی اسی نوعیت کے دھمکی آمیز پیغامات افغان اکاؤنٹس سے جاری کیے گئے تھے، خصوصاً اس وقت جب افغانستان میں فوجی پریڈ کا انعقاد کیا گیا تھا۔ ان پوسٹس میں لاہور پر افغان پرچم لہرانے اور اسلام آباد کو نشانہ بنانے جیسے بیانات شامل تھے۔
مزید برآں، افغان میڈیا پلیٹ فارم “آماج نیوز” نے بھی 2 نومبر کو ایسی ہی ایک پوسٹ میں ان متنازع پیغامات کو شیئر کیا تھا۔
ذرائع کے مطابق ابتدائی شواہد اس بات کی طرف اشارہ کرتے ہیں کہ اسلام آباد اور نئی دہلی میں ہونے والے دھماکے پاکستان مخالف عناصر کی مشترکہ سازش کا نتیجہ ہو سکتے ہیں، جن کا مقصد ملک میں عدم استحکام پیدا کرنا اور پاکستان کو نقصان پہنچانا ہے۔