اسلام آباد (خصوصی رپورٹ) زمینی اور فضائی محاذ پر دشمن کو مؤثر جواب دینے کے ساتھ ساتھ پاکستان نے سائبر جنگ میں بھی بھارت کو ہدف بنایا ہے۔ اطلاعات کے مطابق، پاکستانی ہیکرز نے حالیہ دنوں میں متعدد اہم بھارتی ویب سائٹس کو کامیابی سے ہیک کر لیا ہے۔
ذرائع کے مطابق، ہیک کی جانے والی ویب سائٹس میں “آسام رائفلز”، “بھارتی محکمہ توانائی” اور “انڈین ڈیفنس پروڈکشن” شامل ہیں، جن میں موجود حساس معلومات کو نہ صرف چوری کیا گیا بلکہ ان میں سے کچھ ڈیٹا کو ڈارک ویب پر فروخت کے لیے پیش بھی کر دیا گیا ہے۔
ہیک شدہ ویب سائٹس پر پیغامات درج کیے گئے جن میں لکھا گیا: “بھارت دہشتگردی کا گڑھ ہے” اور “انڈین دہشتگردی کے ناقابل تردید ثبوت”۔ یہ پیغامات سائبر حملے کی شدت اور اس کے پیچھے موجود مقصد کو واضح کرتے ہیں۔
اس سے قبل بھی پاکستان کی سائبر ٹیم نے مہاراشٹرا اسٹیٹ الیکٹرسٹی ٹرانسمیشن کمپنی پر بڑا حملہ کیا تھا، جس کے نتیجے میں صوبے بھر میں بجلی کا نظام درہم برہم ہو گیا تھا۔ اس حملے کے دوران نہ صرف بجلی بند ہوئی بلکہ کمپنی کے تمام کمرشل و گھریلو میٹرز کا ریکارڈ بھی حذف کر دیا گیا تھا۔
پاکستانی سائبر ایکسپرٹس کی یہ کارروائیاں دشمن کو واضح پیغام دے رہی ہیں کہ پاکستان نہ صرف زمینی و فضائی دفاع میں مضبوط ہے بلکہ ڈیجیٹل میدان میں بھی ہر جارحیت کا بھرپور جواب دینے کی صلاحیت رکھتا ہے۔
