لاہور، اسلام آباد( آن لائن )پنجاب میں کورونا وائرس کے مریضوں کی تعداد 8 ہزار سے تجاوز کر گئی، تفصیلات کے مطابق پنجاب میں کورونا وائرس کیسز کی تعداد 8ہزار 103 ہو گئی ہے۔ جبکہ 136 افراد جاں بحق ہو چکے ہیں، اس کے علاوہ 2ہزار 714 افراد صحتیاب ہو چکے ہیں۔

سماجی رابطے کی ویب سائٹ پر جاری ایک پیغام میں وزیراعلی پنجاب عثمان بزدار کا کہنا تھا کہ مجموعی طور پر ایک لاکھ 897 ہزار ٹیسٹ کیے گئے ہیں، وزیراعلی کا کہنا تھا کہ اگر گزشتہ روز ہی کی بات کی جائے تو 5 ہزار 43 ٹیسٹ کئے گئے ہیں۔عثمان بزدار کا کہنا تھا کہ یہ جنگ ہم صرف ایس او پیز پر عمل کرکے ہی جیت سکتے ہیں۔پاکستان میں کورونا وائرس کے مجموعی کیسز کی تعداد 21 ہزار 501 ہوگئی ہے۔ جبکہ 500سے زائد افراد جاں بحق ہو چکے ہیں ۔سندھ میں 7882، خیبرپختونخوا میں 3288، بلوچستان میں 1312، اسلام آباد میں 464، پنجاب 8103، گلگت بلتستان 372 جبکہ آزاد کشمیر میں کورونا وائرس کیسز کی تعداد 71 ہے کل 5 ہزار 782 افراد اس مہلک وائرس سے صحتیابی حاصل کرچکے ہیں۔دنیا بھر میں ایک ہی دن میں کورونا کے 82ہزار نئے کیسز سامنے آگئے، ساڑھے 3 ہزار اموات، دنیا بھر میں 35لاکھ 66ہزار295 افراد متاثر اور 2لاکھ 48ہزار286 افراد جاں بحق ہو چکے ہیں جبکہ 11لاکھ54ہزار57 افراد وائرس سے صحت یاب ہوئے ہیں۔ چار مہینوں سے وائرس کا پھیلا تیزی سے جاری ہے اور 212 ممالک اور مختلف علاقے اس کی لپیٹ میں آ چکے ہیں۔ امریکی میڈیا کے مطابق امریکا کورونا وائرس سے سب سے زیادہ متاثرہ ملک ہے جہاں ناصرف کورونا مریض بلکہ اس سے ہلاکتیں بھی تاحال دنیا کے تمام ممالک میں سب سے زیادہ ہیں۔روس میں مزید ساڑھے 10 ہزار ، برطانیہ میں 4 ہزار 300سے زائد نئے مریض سامنے آ گئے۔