اسلام آباد،کراچی (این این آئی)وزیر اعظم عمران خان نے کہا ہے کہ لوگ نظم و ضبط کا مظاہرہ کریں گے تو بندشوں میں مرحلہ وار نرمی بھی ممکن ہوگی۔مائیکرو بلاگنگ سائٹ ٹوئٹر پر عوام کے لیے جاری اپنے ایک بیان میں عمران خان نے کہا کہ وبائی مرض کے دوران سماجی دوری اختیار کئے رکھیں اور جس قدر ممکن ہو سکے خود کو گھروں تک محدود رکھیں۔
انہوں نے لکھا کہ جتنا لوگ خود کونظم و ضبط سے آراستہ کرینگے اتناہی ہمارے لیے وبا سے نمٹنا آسان ہوگا۔عمران خان نے کہاکہ لوگ نظم و ضبط سے رہیں گے توبندشوں میں مرحلہ وار نرمی بھی ممکن ہوگی۔وزیر اعظم نے اپنے ٹوئٹ میں شوکت خانم ہسپتال کے ڈاکٹروں اور نرسوں کی جانب سے دیا گیا ایک ویڈیو پیغام بھی منسلک کیا جس میں موجود تمام ڈاکٹرز کا کہنا تھا کہ عوام گھروں پر رہ کر کورونا کو ختم کرنے میں اپنا کردار ادا کرسکتے ہیں۔دوسری جانب وزیر تعلیم سندھ سعید غنی نے کہاہے کہ اگر حکومت نے دیکھا کہ ایس او پیرز پر عمل نہیں ہورہا تو فیصلے پر نظر ثانی کرسکتی ہے۔میڈیا سے بات چیت کرتے ہوئے سعید غنی نے کہا کہ انتظامیہ کیلئے بہت مشکل ہوگا کہ ہر مسجد میں جاکر ایس او پی پر عمل کروائیں، یہ مسجد کی انتظامی کمیٹی کی ذمہ داری ہوگی کہ احتیاطی تدابیر پر عمل کروائیں۔انہوں نے کہاکہ کورونا ٹیسٹ زیادہ کریں گے تو مریضوں کی تعداد بھی زیادہ سامنے آئے گی، سندھ میں کورونا سے زیادہ تر اْن افراد کا انتقال ہوا جو پہلے سے بیمار یا بزرگ تھے۔سعید غنی نے کہا کہ ہماری کوشش تھی کہ پورے ملک میں ایک ہی پالیسی ہو لیکن بد قسمتی سے شروع میںہی ملک میں ایک پالیسی پر کام نہیں ہوا۔انہوں نے کہا کہ کورونا سے متعلق فیصلے روزانہ کی بنیاد پر صورتحال کو مدنظر رکھ کر کیے جارہے ہیں۔سعید غنی نے کہا کہ چیف سیکریٹری کے خط کی وجہ سے کنفیوژن ہوگئی تھی، خط میں تھا کہ نئے ریلیف کام میں ٹائیگر فورس کو شامل کریںجبکہ سندھ میں ریلیف کام تو پہلے سے ہی جاری ہیں۔
