اسلام آباد(مانیٹرنگ ڈیسک) سینئرصحافی اور تجزیہ کار صابر شاکر نے اپنی ایک ویڈیو میں دعویٰ کیا ہے کہ بھارت نے پاکستان میں در اندازی کرنے کے لیے بھرپور تیاریاں شروع کر دی ہیں۔صابر شاکر نے کہا کہ بھارت کے جارحانہ عزائم کے حوالے سے پاکستان کے علم میں بہت سی خبریں آئی ہیں۔

اسی حوالے سے وزیر اعظم عمران خان نے بھی اپنے ٹویٹر پر ایک بیان دیا ہے جس میں عالمی برادری کو بھی متنبہ کیا ہے اور بھارت کو بھی متنبہ کیا ہے۔ بھارت نے لائن آف کنٹرول پر اپنی ہی لگائی گئی باڑ کو مختلف مقامات سے کاٹ کر اس میں سے اپنی فوجی گاڑیاں اور ٹینک وغیرہ گزارنے کے لیے راستہ بنایا ہے تاکہ پاکستان میں در اندازی کی صورت میں کوئی ایڈونچر کیا جا سکے۔گولہ باری تو خیر معمول کی بات تھی، اب بھارتی فوج نے میزائل بھی نصب کر دیئے ہیں۔ پاکستان کی جانب سے بھی سرحدوں پر اپنی فوجیں مکمل طرح سے تعینات کر دی گئی ہیں اور متعلقہ ممالک کو بھی بتا دیا گیا ہے کہ ہمارے پاس بھارت کی جنگی تیاریوں سے متعلق تصاویر ہیں اورگراؤنڈ پر یہ صورتِ حال ہے۔ جس سے پتا چلتا ہے کہ بھارت کوئی ایڈونچر کرنا چاہ رہا ہے۔تو ایسے میں ہماری طرف سے کوئی رعایت نہیں کی جائے گی۔ جبکہ بھارتی حکام کو بھی مختلف عسکری اور غیر عسکری چینلز کے ذریعے خبردار کر دیا گیا ہے کہ اگر انڈیا ایک میزائل مارے گا تو ہم دس ماریں گے۔ پاک فوج کو مکمل طور پر اختیار دے دیا گیا ہے کہ آپ نے صورتِ حال کے مطابق بھرپور جواب دینا ہے۔ وزیر اعظم عمران خان کی آرمی چیف اور ڈی جی آئی ایس آئی سے اس حوالے سے ملاقات بھی ہوئی ہے۔سیالکوٹ میں چونڈہ کے سرحدی مقام پر بھی بھارت کی جانب سے غیر معمولی سرگرمی دیکھی گئی ہے۔ وہاں پر بھی پاک فوج نے مکمل تیاری کر رکھی ہے۔پاک فوج کا کہنا ہے کہ بھارت کی کسی بھی در اندازی یا ایڈونچر کا بھرپور جواب دیا جائے گا اور اس معاملے میں کوئی رعایت نہیں برتی جائے گی۔

موضوعات:صابر شاکر