اسلام آباد(نیوزڈیسک) وزیراعظم عمران خان نے قوم سے خطاب میں کہا ہے کہ آر ایس ایس کا نظریہ لوگوں کو قتل عام پر اکساتاہے، مودی کا اقدام کشمیر کی آزادی کا پیش خیمہ ثابت ہوگا، مودی کے احمقانہ اقدام نے مسئلہ کشمیر کو دنیا بھر میں اجاگر کیا ہے،
آج آپ سے کشمیر سے متعلق بات کرنا چاہتا ہوں، حکومت میں آنے کے بعد پہلی کوشش امن و امان تھی، خطے میں امن کے لئے بھارت اور افغانستان سے بات کی، بھارت نے امن کے لئے ہماری ہر کوشش کو رد کیا، امن کوششوں کے جواب میں بھارت نے پاکستان کو بلیک لسٹ کرنے کی کوشش کی ، بھارت نے کشمیر کے اقدام سے بتادیا کہ بھارت صرف ہندوﺅں کا ہے، آر ایس ایس کے لوگوں نے ہی گاندھی کو قتل کیا،وقت ثابت کرے گا کہ مودی نے بڑی غلطی کی، مودی نے تکبر میں آکر مقبوضہ کشمیرمیں اقدام اٹھایا، بھارت آزادکشمیرمیں خفیہ حملے کی منصوبہ بندی کررہاتھا، میں خود کشمیر کا سفیر بن کر مسئلہ دنیا بھر میں اٹھاﺅںگا، انہوں نے کہا کہ نریندر مودی کی وجہ سے کشمیریوں کو آزادی کا موقع مل گیا ہے 1965 ءکے بعد پہلی دفعہ مسئلہ کشمیرپر اقوام متحد ہ کی سلامتی کونسل کا اجلاس بلایاگیا، انہوں نے کہا کہ ہماری کوشش تھی کہ کشمیر کا مسئلہ بات چیت سے حل کریں ، انہوں نے آئندہ جمعتہ المبارک کو بارہ بجے سے ساڑھے بارہ بجے تک کشمیر کے مسئلے پر پوری قوم سے احتجاج کی اپیل کی ، انہوں نے کہا کہ ہم کشمیر کے لوگوں کے ساتھ کھڑے ہیں وہ لوگ ہماری طرف دیکھ رہے ہیں، اور جب تک کشمیریوں کو آزادی نہیں ملے گی ہم ان کے ساتھ کھڑے ہیں ، انہوں نے کہا کہ اس سلسلے میں ہم ہر ہفتے کوئی نہ کوئی بڑا اقدام کریںگے اور ہر ہفتے قوم کو آگاہ کیاجائے گا،
ہم بتائیں گے قوم کو کہ اب کیا کرنا ہے ،انہوں نے کہا کہ بھارت نے اپنا آخری پتہ کھیل دیا، اب جو کرنا ہے ہم کریںگے بھارت نے کشمیر کو اپنا حصہ بناکر عالمی قراردادوں کی خلاف ورزی کی ، انہوں نے کہا کہ میں اقوام متحدہ کو یہ بتانا چاہتاہوں کہ سوا ارب مسلمان آپ کی جانب دیکھ رہے ہیں صرف پاکستانی نہیں بلکہ سوا ارب مسلمان دیکھ رہے ہیں، مسلمانوں پر جب ظلم ہورہاہے تو اقوام متحدہ ہماری مدد کرے گی یا نہیں؟ انہوں نے واضح کیا کہ یہ مسئلہ اگر جنگ کی طرف چلاگیا تو یادرہے دونوں ملکوں کے پاس نیوکلیئر ہتھیار ہیں اور اگر نیوکلیئر جنگ ہوئی تو صرف پاکستان اور بھارت میں تباہی نہیں ہوگی بلکہ اس کے اثرات پوری دنیا پر پڑیںگے، انہوں نے کہا کہ ہم ہر سطح پر آخری سانس تک کشمیریوں کا ساتھ دیںگے۔
