اوکاڑہ(آن لائن) وزیر اعظم عمران خان کے دورہ رینالہ کے دوران مقامی میڈیا کو کوریج سے روک دیا گیا۔ لوکل و پرائیویٹ میڈیا کی بجائے سرکاری صحافیوں کو ہاؤسنگ افتتاحی تقریب کی کوریج کیلئے بطور خاص اسلام آباد سے مدعو کیا گیا۔ سیکیورٹی انچارج عاطف میؤ کا کہنا تھا کہ وزیر اعظم کے دورہ کو صرف سرکاری صحافی ہی کور کریں گے دیگر و مقامی صحافی سرکاری صحافیوں
سے معلومات حاصل کریں۔ذرائع کے مطابق وزیر اعظم کے جلسہ کیلئے بڑی لاگت سے لگژری پنڈال تیار کیا گیا تھا، ائیرکنڈئشنڈ پنڈال میں 350 وی وی آئی پیز، 300 وی آئی پی جبکہ تین ہزار کے قریب پی ٹی آئی کارکنوں کیلئے نشستیں مختص کی گئیں۔ تاہم ڈیوٹی پر مامور پولیس اہلکاروں کیلئے پانی کا کوئی انتظام نہیں کیا گیا ۔ پولیس اہلکار شدید گرمی میں پانی کے بغیر ڈیوٹی دینے پر مجبور رہے۔
