اسلام آباد(مانیٹرنگ ڈیسک)پنجاب کے گورنر چوہدری سرورکی وزیراعظم عمران خان سے دوسری ملاقات بھی ملتوی ۔روزنامہ 92نیوز کے مطابق وزیراعظم گورنرپنجاب کے 2ہفتوں کے غیرملکی دورے سے ناراض ہیں،نعیم الحق نے بھی چوہدری سرورکووزیراعظم کی ناراضی سے آگاہ کیاتھا۔ذرائع کے مطابق آب پاک اتھارٹی بل پر ق لیگ کو تحفظات ہیں،وہ تحفظات دورنہیں کئے گئے ، کچھ میڈیاٹاک شوزمیں چوہدری سرورکے کچھ الفاظ کے استعمال سے

دوریاں بڑھتی ہوئی دکھائی دے رہی تھیں،جس کے بعد چوہدری سرورنے اہم ملاقاتیں شروع کردی ہیں، چوہدری سرورکی ان ملاقاتوں پر بھی ناراضی کا اظہارکیاجارہاہے جبکہ گورنر پنجاب کی تبدیلی کا امکان بھی ہے ۔دریں اثنا چوہدری سرور نے کہا ہے کبھی کہا جاتا ہے کہ وزیر اعظم نے مجھے طلب کر لیا اور کبھی کہتے ہیں کہ وزیر اعظم نے ملاقا ت نہیں کی جبکہ حقیقت میں ایسا کچھ نہیں۔دریں اثناء گورنر پنجاب آج پریس کانفرنس کریں گے جس میں اہم اعلان متوقع ہے ۔