لاہور (این این آئی)مسلم لیگ (ن) کے مرکزی رہنما حنیف عباسی کو ایفی ڈرین کیس میں سزا کی معطلی کے بعد کیمپ جیل سے رہا کر دیا گیا ،رہائی کے موقع پر کارکنوں نے پھولوں کی پتیاں نچھاور کر کے استقبال کیا اور حنیف عباسی اور لیگی قیادت کے حق میں نعرے لگائے ،حنیف عباسی نے کہا کہ مشکل وقت آتا ہے اور گزر جاتا ہے ، رہائی پر اللہ کا شکر ادا کرتا ہوں،
آئندہ کی حکمت عملی کیا ہو گی اس بارے کچھ کہنا قبل از وقت ہوگا ۔تفصیلات کے مطابق لاہو رہائیکورٹ کے دو رکنی بینچ کی جانب سے ایفی ڈرین کیس میں عمر قید کی سزا کی معطلی اور ضمانت پر رہائی کے فیصلے کے بعد دستاویزات مکمل ہونے پر حنیف عباسی کو گزشتہ روز کیمپ جیل سے رہا کر دیا گیا ۔حنیف عباسی کو پچا س ،پچاس لاکھ روپے کے دو ضمانتی مچلکوں کے عوض روبکار کی تصدیق کے بعد رہا کیاگیا۔ کیمپ جیل کے باہر لاہور اور راولپنڈی سے تعلق رکھنے والے کارکن حنیف عباسی کے استقبال کے لئے موجود تھے جنہوں نے جیل سے باہر آتے ہی ان پر پھولوں کی پتیاں نچھاور کیں اور حنیف عباسی اور لیگی قیادت کے حق میں نعرے لگائے ۔ میڈیا سے مختصر گفتگو کرتے ہوئے حنیف عباسی نے کہا کہ اپنی رہائی پر اللہ تعالیٰ کا شکر گزار ہوں ، مشکل وقت آتا ہے اور گزر جاتا ہے ۔ انہوں نے آئندہ کی حکمت عملی کے حوالے سے سوال کے جواب میں کہا کہ ابھی اس بارے کچھ کہنا قبل از وقت ہوگا۔ حنیف عباسی 8 مہینے اور22 روز بعد ضمانت پر رہاہوئے۔حنیف عباسی کے صاحبزادے حماس عباسی نے میڈیا سے گفتگو کرتے ہوئے کہا کہ والد کو رہائی ملنے پر اللہ تعالیٰ کے بیحد شکرگزار ہیں اور پارٹی قیادت سمیت کارکنان کے تعاون کے بھی مشکور ہیں۔
