اسلام آباد(مانیٹرنگ ڈیسک)پی ٹی آئی رکن قومی اسمبلی بریگیڈئیر(ر) اعجاز شاہ کی وفاقی وزیر برائے پارلیمانی امور بننے کے بعدپہلی بار ننکانہ صاحب آمد ، شہریوں اور کارکنوں نے پرتپاک استقبال کیا ، ڈھول کی تھاپ پر رقص ۔

میڈیا رپورٹس کے مطابق بریگیڈئیر(ر) اعجاز احمدشاہ نے استقبالیہ تقریب سے خطاب کرتے ہوئےکہاکہ پاکستان میں انصاف نام کی کوئی چیز نہیں ۔یہاں غریب کے لیے علیحدہ اور امیر کے لیے علیحدہ قانون ہے ۔ ملک لوٹنے والے جب سے احتساب کی زد میں آئے ہیں تو وہ چیخ چیخ کر کہہ رہے ہیں کہ ہمیں سیاسی انتقام کا نشانہ بنایا جارہا ہے جب کہ اگر آج بچہ بھی انٹر نیٹ پر سرچ کرے تو اسے بھی پتہ چل جاتا ہے کہ دنیا کے سو بڑے کرپٹ لوگ کون ہیں ۔انہوں نے کہا میں قسم کھا کر کہہ سکتا ہوں کہ عمران خان ایک ایماندار انسان ہے اور وہ پاکستان کی بہتری کے لیے شب و روز کوشش کرر ہا ہے ، انہوں نے کہا کہ معاشرے میں بے حسی کی انتہا ہوچکی ہے ہر طرف کرپشن ، لوٹ مار ، بے روز گاری اور ناانصافی کا دور دورہ ہے ۔واضح رہے کہ بریگیڈئیر(ر) اعجاز احمدشاہ کو گزشتہ ہفتے وفاقی وزیر بنایا گیا تھاجس پر پیپلز پارٹی کی جانب سے شدید ردعمل سامنے آیا تھا۔