اسلام آباد (این این آئی)وفاقی وزیراطلاعات ونشریات چودھری فواد حسین نے کہا کہ نواز شریف اور آصف زرداری سے ہماری کوئی ذاتی لڑائی نہیں ، ان کیخلاف درج مقدمات ہمارے بنائے نہیں،وزیراعظم بڑے دل کے آدمی ہیں، پنجاب حکومت کو نواز شریف کو ہر ممکن طبی سہولیات فراہم کرنے کی ہدایت کی ہے، بھارت کے معاملے پر پوری قوم متفق ہے ،چاہتے ہیں مختلف معاملات میں ایسا ہی اتفاق رائے قائم ہونا چاہئے ،
پاکستان کے حالیہ موقف کو پوری دنیا میں پذیرائی ملی جبکہ مودی کے اقدام پر بھارت کو دنیا بھر میں تنقید کا سامنا کرنا پڑا۔جمعرات کو پارلیمنٹ ہاؤس کے باہر میڈیا سے گفتگو کرتے ہوئے وزیراطلاعات چودھری فواد حسین نے کہا کہ نواز شریف سے ہماری کوئی ذاتی لڑائی نہیں اور نہ ہی آصف زرداری سے کوئی ذاتی لڑائی ہے ،ان کے خلاف درج مقدمات ہمارے بنائے ہوئے نہیں ہیں۔ انہوں نے کہا کہ ان لوگوں کو اس بنیاد پر نہیں چھوڑ سکتے کہ وہ پارلیمانی لیڈر ہیں ۔ انہوں نے کہاکہ اس سب کے باوجود وزیراعظم نے پنجاب حکومت کو ہدایات جاری کی ہیں کہ سابق وزیراعظم محمد نواز شریف کو ہر ممکن طبی سہولیات فراہم کی جائیں ۔ انہوں نے کہا کہ وزیراعظم عمران خان بڑے دل کے آدمی ہیں ۔ انہوں نے کہا کہ حالیہ دنوں میں تمام پارٹیز میں ایک اتفاق رائے پیدا ہوا ہے ،بھارت کے معاملے پر پوری قوم کا اتفاق رائے ہے ۔ انہوں نے کہا کہ ہم چاہتے ہیں مختلف معاملات میں ایسا ہی اتفاق رائے قائم ہونا چاہئے ۔ انہوں نے کہا کہ سال 2014 میں بننے والے نیشنل ایکشن پلان پر تمام جماعتوں نے اتفاق کیا تھا ۔ انہوں نے کہا کہ کچھ تنظیموں پر پہلے ہی پابندی ہے ، ہمیں اپنے ملک کے وقار کو مد نظر رکھنا ہے ۔ انہوں نے کہا کہ پاکستان کے حالیہ موقف کو پوری دنیا میں پذیرائی ملی جبکہ نریندر مودی کے اقدام پر بھارت کو پوری دنیا کی جانب سے تنقید کا سامنا کرنا پڑا ہے۔
