اسلام آباد(مانیٹرنگ ڈیسک)آبی وسائل کے وفاقی وزیر فیصل واوڈا نے کہا ہے کہ وہ وزیر اعلیٰ پنجاب عثمان بزدار کو فون کر کے کہیں گے کہ جب وہ سفر کریں تو گردن گھما کر اپنے پروٹوکول کی گاڑیوں کو دیکھ لیا کریں۔نجی ٹی وی پروگرام میں گفتگو کرتے ہوئے وفاقی وزیرکا کہنا تھا کہ وزیر اعظم عمران خان اگر ہمیں 4 گاڑیاں رکھنے کی اجازت دیں گے تو ہم اپنے پاس دو گاڑیاں رکھیں گے۔
وزیر اعلیٰ عثمان بزدار کے پروٹوکول میں شامل زیادہ گاڑیوں کے حوالے سے سوال کا جواب دیتے ہوئے فیصل واوڈا نے مزید کہا کہ وہ وزیر اعلیٰ پنجاب عثمان بزدار کو اس حوالے سے فون کریں گے۔انہوں نے مزید کہا کہ وزیراعلیٰ پنجاب کے قافلے میں زیادہ ترگاڑیاں حکومت پنجاب کی نہیں۔واضح رہے کہ گزشتہ روز وزیر اعلیٰ پنجاب نے ٹوبہ ٹیک سنگھ کا دورہ کیا تھا ،ان کے پروٹوکول میں 26 گاڑیاں شامل تھیں ۔
