اسلام آباد(اے این این)تحریک انصاف کی حکومت کے 100 روز مکمل ہونے میں چند روز باقی لیکن 50 لاکھ گھروں کے منصوبہ کے حوالے سے ٹاسک فورس کا ابتدائی کام بھی مکمل نہ ہوسکا۔ ذرائع کے مطابق موجودہ حکومت اپنے ابتدائی 100 دنوں میں عوام سے کئے گئے وعدے پورے کرنے میں اب تک ناکام دکھائی دے رہی ہے اور خاص طور پر 50 لاکھ گھروں کے منصوبہ پر ٹاسک فورس کا ابتدائی کام مکمل نہ ہوسکا اور نہ ہی منصوبہ کے مالیاتی پروگرام کی حتمی تشکیل ہوسکی ہے۔
ذرائع کے مطابق وزیراعظم عمران خان نے متعلقہ وزارتوں کو 29 نومبر تک کام مکمل کرنے کی ہدایت کرتے ہوئے کہا کہ منصوبہ کیلئے اراضی کے انتظامات کو یقینی بنایا جائے کیوں کہ گھروں کا منصوبہ حکومتی منشور میں سر فہرست ہے۔ وزیراعظم نے وزارت قانون کو قانونی پیچیدگیوں میں مدد فراہم کرنے کی ہدایت کرتے ہوئے کہا کہ بینکوں سے قرضوں کے حصول میں پیچیدگیاں دور کی جائیں۔دوسری جانب ذرائع کا کہنا ہے کہ سرکاری اراضی کے حصول کیلئے اداروں کو خطوط لکھ دیے گئے ہیں۔
