واشنگٹن(این این آئی)امریکی صدر ڈونلڈ ٹرمپ نے اپنی تازہ ٹوئٹ میں ایک بار پھر پاکستان کیخلاف ہرزہ سرائی کرتے ہوئے کہا ہے کہ ہم نے اربوں ڈالر دئیے لیکن پاکستان نے کبھی نہیں بتایا کہ اسامہ وہاں ہے ٗنائن الیون حملے سے پہلے ہی میں نے اپنی کتاب میں اسامہ کی نشاندہی کردی تھی۔ڈونلڈ ٹرمپ نے اپنی تازہ ٹوئٹ میں کہا کہ امریکہ کو القاعدہ کے بانی اسامہ بن لادن کو بہت پہلے ہی پکڑ لینا چاہیے تھا ٗ نائن الیون حملے سے پہلے ہی میں نے اپنی کتاب میں اسامہ کی نشاندہی کردی تھی، صدر بل کلنٹن

اسامہ بن لادن کے معاملے میں چوک گئے۔ ٹرمپ نے لکھا کہ ہم نے اربوں ڈالر دئیے لیکن پاکستان نے کبھی نہیں بتایا کہ اسامہ وہاں ہے۔امریکی صدر نے ایک بار پھر امداد بند کرنے کی دھمکی دیتے ہوئے لکھا کہ اب مزید اربوں ڈالر پاکستان کو نہیں دیں گے ٗپاکستان نے ہمارے پیسے لے کر بھی ہمارے لیے کچھ نہیں کیا، اسامہ بن لادن اس کی بڑی مثال ہے جبکہ افغانستان دوسری مثال ہے۔ٹرمپ نے کہا کہ پاکستان بھی ایسے ممالک میں سے ایک تھا جو امریکا سے پیسے لیتے تھے لیکن بدلے میں انہوں نے کچھ نہیں دیا۔