کراچی(این این آئی)پاکستانی ڈرامہ انڈسٹری کے معروف سینئر اداکار اورنگزیب لغاری نے شوبز میں کام نہ ملنے کی صورت میں فرنیچر کا کاروبار شروع کر دیا ہے۔سرکاری ٹی وی کے لیجنڈ اداکار اورنگزیب لغاری کے حال ہی میں دیے گئے متعدد انٹرویوز سوشل میڈیا پر وائرل ہیں جن میں انہیں کام نہ ملنے کا شکوہ کرتے ہوئے دیکھا جا سکتا ہے۔

اداکار نے بتایاکہ چونکہ شوبز انڈسٹری 70 سے 80 فیصد لاہور سے کراچی منتقل ہو گئی ہے اسی لیے ان کے پاس کام کے مواقع بہت کم ہیں۔اورنگزیب لغاری نے کہاکہ وہ بھی کام کے سلسلے میں کراچی میں منتقل ہوئے تھے مگر وہاں انہیں کام سے متعلق خاص مواقع میسر نہیں آئے اسی لیے وہ دوبارہ لاہور شفٹ ہو گئے۔انہوں نے کہاکہ نہ اب انہیں ڈراموں کی آفر ہوتی ہے اور نہ ہی کام ملتا ہے، اس فیلڈ کو اب ہماری ضرورت نہیں رہی۔