اسلام آباد ( آن لائن ) وزیرخارجہ مخدوم شاہ محمودقریشی نے کہا ہے کہ سی پیک میں ایران کے شامل ہونے اور افغانستان میں قیام امن کا فائدہ سب کوہوگا، یہ بھارت کیلئے ایک جھٹکا ہے۔بھارت پاکستان کو تنہا کرناچاہتا تھا ، لیکن اب خود تنہا ہو چکا ہے۔

اپنے ایک بیان میں وزیر خارجہ نے کہا کہ سی پیک میں ایران کی شمولیت بھارت کیلئے ایک جھٹکا ہے، بھارتی حکومت پر اپوزیشن تنقیدکر رہی ہے۔شاہ محمود قریشی نے کہا کہ چین اور بھارت میں کشیدگی سے کئی بھارتی فوجی ہلاک اور زخمی ہوئے، نیپال کی پارلیمنٹ کو قراردارکے ذریعے مطالبات پیش کرنے پڑگئے ہیں۔ وزیر خارجہ نے کہا کہ بھارت کے بنگلہ دیش کے ساتھ تعلقات میں بھی پہلے جیسی گرمجوشی نہیں ہے۔انہوں نے کہا کہ بھارت پاکستان کو تنہا کرنا چاہتا تھا، لیکن اب وہ خود تنہا ہو چکا ہے۔وزیر خارجہ نے کہا کہ کل بھارتی سفارتکارکلبھوشن کی کوئی بات سنے بغیرچلے گئے۔ بھارتی سفارتکار بات کرنے سے کتراتے رہے،کلبھوشن پکارتا رہا، بھارتی سفارت کار دم دبا کر بھاگ گئے۔ شاہ محمودقریشی نے کہا کہ بھارت کی بدنیتی کھل کر سامنے آگئی ہے، یہ رسائی نہیں چاہتے تھے۔ انہیں شیشے پر اعتراض تھا وہ بھی ہٹا دیا۔ ہم نے یہ بھی کہا کہ ایک کے علاوہ سکیورٹی اہلکار بھی ہٹا دیتے ہیں۔ شاہ محمودقریشی نے کہا کہ سکیورٹی کے پیش نظر کلبھوشن کو بالکل تنہا نہیں چھوڑ سکتے تھے، پتہ نہیں کیا کر لیتے۔