اسلام آباد (صباح نیوز)وزیراعظم عمران خان نے کہا ہے کہ عورت مارچ میں ثقافتی تضاد ابھر کر سامنے آ گیا جو دہرے تدریسی نظام کی عکاسی کرتا ہے،سرکاری اور نیم سرکاری اسکولوں میں پڑھائے جانے والے نصاب کی بدولت ثقافتی تضاد کی خلا گہری ہوتی جاری ہے۔ اسلام آباد میں 20 ہزار گھروں کی تعمیر کے سات منصوبوں کا سنگ بنیاد رکھنے کی تقریب سے خطاب میں وزیراعظم نے کہا کہ
جو لوگ نجی اسکولوں میں غیرمعمولی فیس دیکر تعلیم حاصل کرکے جب معاشرے کو دیکھتے ہیں تو انہیں بے پناہ خامیاں نظر آتی ہیں جو عورت مارچ کی صورت میں دیکھ سکتے ہیں۔ وزیراعظم نے کہا کہ ʼآئندہ برس تک وزارت تعلیم تمام سرکاری اور نجی اسکولوں کیلئے ایک نصاب پر مشتمل ایک لائحہ عمل پیش کریگی تاکہ تدریسی اداروں سے ایک قوم ابھرے اور ثقافتی تفریق ختم ہو۔
