پشاور (این این آئی)خیبرپختونخوا کے مختلف شہروں میں بارشوں نے تباہی مچادی جس کے نتیجے میں 5 افراد جاں بحق ہوگئے۔صوبائی ڈیزاسٹر مینجمنٹ اتھارٹی کے مطابق صوبے میں بارشوں کے باعث 3 مکانات کو نقصان پہنچا اور مختلف واقعات میں 5 افراد جاں بحق اور 8 زخمی ہوگئے۔پی ڈی ایم اے نے متعلقہ ضلعی انتظامیہ کو فوری امدادی کارروائیوں کی ہدایت کی ہے۔دوسری جانب محکمہ ریلیف خیبرپختونخوا نے
بتایا کہ تیز آندھی اور طوفان سے شانگلہ اور تورغر کے مابین رابطہ پل ٹوٹ گیا ہے جس کے باعث ٹریفک کی روانی معطل ہوگئی ہے۔علاوہ ازیں ملک میں کہیں بارش اور کہیں برفباری کا سلسلہ جمعرات کو بھی جاری رہا ،آزاد کشمیرکی وادی نیلم،گریس، لیپہ اور قریبی شہروں کے پہاڑوں پربرف باری ہوئی ہے ، نکیال، میرپور اورکئی شہروں میں وقفے وقفے سے ابر کرم برستا رہا ۔ لاہور اور فیصل آباد سمیت پنجاب کے بیشتر مقامات پر بھی رم جھم جاری رہی۔
