اسلام آباد(آن لائن)وفاقی وزیر مملکت برائے ماحولیاتی تبدیلی زرتاج گل کے بارے میں حافظ حمداللہ کی جانب سے نازیبا الفاظ کا معاملہ، زرتاج گل احتجاجاََ شو چھوڑ کر چلی گئیں،جے یو آئی ف کے رہنما حافظ حمداللہ نے اپنی ویڈیو کے حوالے سے زرتاج گل کو بہن قرار دیتے ہوئے معافی مانگ لی۔
منگل کے روز نجی ٹی وی کے پروگرام میں وفاقی وزیر مملکت زرتاج گل اور جمیعت علمائے اسلام ف کے رہنما حافظ حمد اللہ شریک تھے زرتاج گل نے ان کی موجودگی میں پروگرام میں بیٹھنے سے انکار کردیا اور چند روزقبل کی ویڈیو میں حافظ حمداللہ کی جانب سے غیر اخلاقی زبان اتعمال کرنے کا حوالہ دیتے ہوئے شو سے اٹھ کر چلی گئیں۔تاہم بعد ازاں حافظ حمداللہ نے زرتاج گل کو بہن قرار دیتے ہوئے معافی مانگ لی،سینیٹر حافظ حمداللہ کا کہنا ہے کہ وزیرمملکت میری بہن ہیں اور میری بھی بہنیں اور بیٹیاں ہیں۔ انھوں نے کہا کہ جو خاتون جہاں بھی موجود ہو وہ میری بہن ہے۔ میں اپنے بیان پر ان سے معافی چاہتا ہوں۔انھوں نے کہا کہ اگر میری وضاحت سے زرتاج گل کو تسلی نہیں ہوئی تو میں ان سے معذرت خواہ ہوں۔
