اسلام آباد (این این آئی) صدر مملکت ڈاکٹر عارف علوی اور وزیراعظم پاکستان عمران خان نے کوئٹہ میں مسجد میں بم دھماکے کی شدید الفاظ میں مذمت کرتے ہوئے دھماکے میں قیمتی جانوں کے ضیاع پر گہرے دکھ اور افسوس کا اظہار کیا ہے۔ تفصیلات کے مطابق صدر مملکت ڈاکٹر عارف علوی نے کوئٹہ کے علاقے سیٹلائٹ ٹاؤن کی مسجد میں دھماکے کی شدید الفاظ میں مذمت کرتے ہوئے دھماکے میں قیمتی جانوں کے ضیاع پر گہرے دکھ اور غم کا اظہار کیا ہے۔ صدر مملکت نے شہداء کی بلندی درجات،
اہل خانہ کیلئے صبر جمیل اور زخمیوں کی جلد صحت یابی کیلئے بھی دعا کی۔ صدر مملکت نے کہا کہ دہشت گرد ملک میں بدامنی پیدا کرنے کی مذموم کوششیں کر رہے ہیں، قوم ان ناپاک سازشوں کے خلاف متحد ہے۔ وزیراعظم عمران خان نے اپنے بیان میں کوئٹہ میں دھماکے کی شدید مذمت کرتے ہوئے قیمتی جانوں کے ضیاع پر گہر ے دکھ اور افسوس کا اظہار کیا۔وزیر اعظم نے زخمیوں کو بہترین طبی امداد کی فراہمی کی ہدایت کرتے ہوئے حکومت بلوچستان سے واقعہ کی رپورٹ طلب کرلی۔