اسلام آباد (آن لائن ) وزیراعظم عمران خان نے متحدہ عرب امارات کے ولی عہد شیخ محمد بن زاید النہان کو فون کیا ہے، دونوں رہنماوں کے مابین ٹیلی فونک گفتگو میں باہمی دلچسپی کے امور سمیت اہم ایشوز پر تبادلہ خیالات کیا گیا.اماراتی میڈیا کے مطابق ٹیلی فونک گفتگو میں دونوں رہنماوں نے باہمی دلچسپی کے امور پر تبادلہ خیال کیا۔بات چیت میں خطے اور عالمی امور کے حوالے سے بھی گفتگو ہوئی۔
قبل ازیں سات نومبر کو بھی دونوں رہنماوں میں ٹیلی فونک رابطہ ہوا تھا، وزیراعظم عمران خان نے عرب امارات کے ولی عہد سے کشمیر کی صورتحال پر بھی بات چیت کی اور کشمیر میں کرفیو کے بارے میں آگاہ کیا، دونوں رہنماؤں کے مابین باہمی تعلقات میں مضبوطی کا اعادہ کیا گیا، واضح رہے کہ وزیراعظم عمران خان نے اماراتی ولی عہد سے ایسے وقت میں رابطہ کیا جب ملائیشا میں کانفرنس جاری ہے اور پاکستان نے اس کانفرنس کا بائیکاٹ کیا ہے، سعودی عرب نے بھی کانفرنس میں شرکت نہیں کی۔ واضح رہے کہ اس سے قبل وزیراعظم عمران خان نے سعودی عرب کے دباؤ پر ملائیشیا کا اہم سرکاری دورہ منسوخ کیا۔ چونکہ سعودی عرب کو کوالالمپور سربراہ اجلاس میں شرکت کی دعوت نہیں دی گئی، سعودی عرب اور متحدہ عرب امارات کی قیادت کو یہ خدشہ ہے کہ کوا لالمپور سربراہ اجلاس کہیں او آئی سی کی جگہ نہ لے لے۔ قبل ازیں وزیراعظم عمران خان نے ملائیشین ہم منصب ڈاکٹر مہاتیر محمد کو فون کرکے کوالالمپور کانفرنس میں شرکت نہ کرنے اور اس حوالے سے سعودی عرب کے تحفظات سے آگاہ کیا ہے۔میڈیا رپورٹس کے مطابق وزیراعظم عمران خان کے دورہ سعودی عرب کے دوران ملائیشیا میں ہونیوالی 6 اسلامی ممالک کے سربراہی اجلاس پر سعودی عرب کی قیادت نے تحفظات کا اظہار کیا تھا۔ ملائیشیا کے وزیراعظم مہاتیر محمد کی قیادت میں 19 سے 21 دسمبر تک کوالالمپور میں اسلامی سربراہی کانفرنس منعقد ہورہی ہے۔ قومی سلامتی کے حصول میں ترقی کے کردار کے مرکزی موضوع پر کانفرنس میں میزبان ملک کے علاوہ انڈونیشیا، قطر اور ترکی کے نمائندے بھی شریک ہیں۔
