اسلام آباد(سی پی پی)ڈائریکٹر الیکشن کمیشن ندیم قاسم نے کہاہے کہ کسی جماعت کے ساتھ اسپیشل ٹریٹمنٹ نہیں کی جارہی ہے، الیکشن کمیشن آئین اور قانون کے مطابق کام کر رہا ہے۔ نجی ٹی وی سے گفتگو کرتے ہوئے ڈائریکٹر الیکشن کمیشن ندیم قاسم نے کہا کہ الیکشن کمیشن قانون پر یقین رکھتا ہے، اگر فنڈنگ کا کیس ساتھ سننے کی صورتحال سامنے آتی ہے تو غور کریں گے۔ندیم قاسم نے کہا کہ اسکروٹنی کمیٹی اپنی رپورٹ
کمیشن کو پیش کرے گی جو پھر سماعت کرے گا، ایک ساتھ تین جماعتوں کے کیس کو نہیں دیکھا جاسکتا۔انہوں نے کہا کہ پالیسی فیصلے کے لیے الیکشن کمیشن کا مکمل ہونا ضروری ہوتا ہے، الیکشن کمیشن مکمل نہیں ہوگا تو ضمنی الیکشن اور عدالتی مسائل سامنے آئیں گے۔ندیم قاسم نے بتایا کہ خالی سیٹوں کو پر کرنے کے لیے الیکشن کمیشن مراسلہ بھیج چکا ہے، الیکشن کمیشن میں تعیناتیاں حکومت، اپوزیشن اور پارلیمنٹ کی ذمے داری ہے۔