نیویارک (صباح نیوز) بھارت نے امریکا کے صدر ڈونلڈ ٹرمپ کی جانب سے کشمیر کے معاملے پر ثالثی کی پیش کش کو پھر مستردکرتے ہوئے کہا ہے کہ ثالثی سے متعلق اس کا موقف دنیا کو معلوم ہے۔ بھارت کی وزارتِ خارجہ کے ترجمان رویش کمار کا کہنا ہے کہ بھارت متعدد مواقع پر دنیا کو اپنے موقف سے آگاہ کر چکا ہے۔
پاکستان اور بھارت تنازعات دو طرفہ مذاکرات کے ذریعے حل کرنے کے پابند ہیں۔ انہوں نے کہا کہ بھارت کے وزیر اعظم نریندر مودی واضح کر چکے ہیں کہ شملہ معاہدہ اور اعلان لاہور کے مطابق پاکستان اور بھارت باہمی تنازعات دو طرفہ مذاکرات کے ذریعے حل کرنے کے پابند ہیں لہٰذا کسی تیسرے فریق کی مداخلت کی ضرورت نہیں۔